मुंबई येथील साई भक्तांची सेवा म्हणजे जाज्वल्य आणि निस्सीम त्यागाचे प्रतीक- पंडित वाघिरे

मुंबई येथील साई भक्तांची सेवा म्हणजे जाज्वल्य आणि निस्सीम त्यागाचे प्रतीक- पंडित वाघिरे

जिल्हा परिषद प्राथमिक शाळा गणेशनगर, तालुका राहता येथे गुरुपौर्णिमा उत्सव मोठ्या उत्साहात साजरा करण्यात आला. सालाबादप्रमाणे याही वर्षी मुंबई आणि ठाणे येथील साईभक्त शिर्डी येथील साईबाबांच्या दर्शनासाठी पालखी सोहळा घेऊन शाळेत आले. येताना साईभक्त शाळेतील विद्यार्थ्यांच्या रूपात साईबाबांना पाहतात आणि म्हणून जवळजवळ दोन लाख रुपयाचे शैक्षणिक साहित्य विद्यार्थ्यांना मोफत वाटप केले. या कार्यक्रमाचे अध्यक्षस्थानी राहता पंचायत समितीचे गटविकास अधिकारी पंडित वाघिरे तर प्रमुख पाहुणे म्हणून गटशिक्षणाधिकारी अभयकुमार वाव्हळ उपस्थित होते. कोल्हार येथील व्यापारी कैलास पटेल आणि दिलीप पटेल यांच्या वतीने गुरुपौर्णिमेच्या निमित्ताने शाळेतील सर्व विद्यार्थ्यांना अतिशय उत्कृष्ट प्रकारचे मिष्टान्न भोजन देण्यात आले. गटविकास अधिकारी म्हणाले, मुंबई आणि ठाणे येथील साईभक्त गेले नऊ वर्षापासून या शाळेमध्ये पालखी सोहळा घेऊन येतात आणि विद्यार्थ्यांना विविध प्रकारचे शैक्षणिक साहित्य देतात म्हणजे येथील साईभक्तांची सेवा ही खरोखर जाज्वल्य आणि निस्सीम त्यागाचे प्रतीक आहे .सदर कार्यक्रमाच्या प्रसंगी स्वर्गीय भाऊसाहेब वाघ यांच्या स्मरणार्थ शहाणे आणि वाघ परिवाराच्या वतीने शाळेतील प्रत्येक वर्गातील प्रथम क्रमांकाने येणाऱ्या विद्यार्थी आणि विद्यार्थिनी यांना तसेच प्रत्येक वर्गातील एक आदर्श विद्यार्थी आणि विद्यार्थिनी यांना रोख स्वरूपात बक्षीस वाटप करण्यात आले. रोख स्वरूपातील बक्षिसांची रक्कम एकूण 17600 रुपये होती. या कार्यक्रमासाठी प्रमुख मान्यवर म्हणून दत्तगुरु पतसंस्थेचे सोपानकाका कासार, कारखान्याचे संचालक अनिल काका गाढवे, सरपंच सुनीता कासार, शाळा व्यवस्थापन समिती अध्यक्ष रोहिणी घोगळ, राजेंद्र जाधव, विजय सदाफळ ,भारती मोहन, मनीषा खरात ,जयंत गिरमे, अशोकराव कदम ,कविता कदम ,किशोर कदम उपस्थित होते .कार्यक्रमात अनेक मान्यवरांनी गुरुपौर्णिमा आणि साईबाबांचे महत्त्व विद्यार्थ्यांना विशद करून शाळेत चालू असणाऱ्या विविध उपक्रमांचे विशेष कौतुक केले. सदर प्रसंगी शिक्षण विस्तार अधिकारी ज्ञानेश्वर जाधव, केंद्रप्रमुख सचिन घुसळे,सेवानिवृत्त मुख्याध्यापक संजय घोलप, सुनील लोमटे,साईभक्त आशुतोष शहाणे, प्रवीण भावसार, सौरभ वाघ हे देखील उपस्थित होते. सदर प्रसंगी शाळेतील विद्यार्थिनींच्या वतीने आलेल्या प्रत्येक साई भक्तांचे कुमकुम तिलक लावून आणि लेझीम पथकाच्या जयघोष करून स्वागत करण्यात आले. मान्यवरांच्या हस्ते श्रद्धा आणि सबुरीचा मंत्र देणारे आणि सबका मालिक एक असा संदेश जगाला देणाऱ्या साईबाबांच्या प्रतिमेची आरती करण्यात आली.कार्यक्रमाचे प्रास्ताविक मुख्याध्यापक कैलास चिंधे यांनी तर आभार प्रदर्शन वेरोनिका गायकवाड यांनी मानले . कार्यक्रमाचे सूत्रसंचालन दत्ता गायकवाड यांनी केले.सदर प्रसंगी शाळेतील शिक्षक सुनील गायकवाड, सुनीता गागरे, सोनल भावसार ,मनीषा डोंगरे, भाऊसाहेब सहाणे यांचे सहकार्य लाभले.

महायुती सरकारच्या पाठपुराव्याला यश; सिस्पे घोटाळ्यातील मास्टरमाइंडला फिजीमधून अटक

महायुती सरकारच्या पाठपुराव्याला यश; सिस्पे घोटाळ्यातील मास्टरमाइंडला फिजीमधून अटक 

मुख्यमंत्री देवेंद्र फडणवीस आणि पालकमंत्री राधाकृष्ण विखे पाटील यांच्या पाठपुराव्यानंतर मोठी घडामोड

अहिल्यानगर

 सिस्पे घोटाळ्याप्रकरणी अनेक दिवसांपासून फरार असलेला आणि या प्रकरणातील मास्टरमाइंड म्हणून तपास यंत्रणांकडून शोध घेतला जात असलेला राहुल श्यामराव काळोखे याला अखेर इंटरपोलच्या मदतीने फिजीमध्ये ताब्यात घेण्यात आले. त्यानंतर आवश्यक कायदेशीर प्रक्रिया पूर्ण करत त्याला भारतात आणण्यात आले असून, मुंबई विमानतळावर त्याला अटक करण्यात आली आहे. या घडामोडीमुळे दीर्घकाळ प्रलंबित असलेल्या तपासाला महत्त्वाची दिशा मिळाली आहे. 

तपासादरम्यान राहुल काळोखे याच्याविरोधात जानेवारी महिन्यात इंटरपोलमार्फत रेड कॉर्नर नोटीस जारी करण्यात आली होती. या नोटीसमुळे जगभरातील 196 देशांच्या कायदा अंमलबजावणी यंत्रणांना त्याचा शोध घेण्यासाठी अधिकृत माहिती पाठविण्यात आली. त्यानंतर तो फिजीमध्ये असल्याची माहिती समोर आल्यानंतर तेथील संबंधित अधिकाऱ्यांनी त्याला ताब्यात घेतले आणि भारतात प्रत्यार्पणाची प्रक्रिया सुरू करण्यात आली.

आंतरराष्ट्रीय समन्वयानंतर राहुल काळोखे याला भारतात आणण्यात आले. आज दुपारी मुंबई विमानतळावर त्याच्यावर अधिकृतपणे अटकेची कारवाई करण्यात आली. पुढील चौकशीसाठी त्याला संबंधित तपास यंत्रणांच्या ताब्यात देण्यात येणार असून, या प्रकरणातील आर्थिक व्यवहार, इतर आरोपींची भूमिका आणि घोटाळ्याचे संपूर्ण जाळे उघड करण्यासाठी त्याची कसून चौकशी होण्याची शक्यता आहे.

या प्रकरणात अहिल्यानगरचे पालकमंत्री राधाकृष्ण विखे पाटील यांनी सुरुवातीपासून सातत्याने पाठपुरावा केला. तसेच राज्याचे मुख्यमंत्री देवेंद्र फडणवीस यांनी केंद्र सरकारशी समन्वय साधत आवश्यक स्तरावर पत्रव्यवहार करून तपास प्रक्रियेला गती मिळावी यासाठी प्रयत्न केले. या पाठपुराव्यानंतर विविध तपास यंत्रणांमधील समन्वय अधिक प्रभावी झाले, त्यातून आरोपीचा माग काढून त्याच्यापर्यंत पोहोचण्यास मदत झाली.

ही कारवाई यशस्वी करण्यासाठी महाराष्ट्र पोलीस, केंद्रीय अन्वेषण विभाग (सीबीआय), केंद्रीय गृह मंत्रालय, परराष्ट्र मंत्रालय, इमिग्रेशन विभाग आणि इंटरपोल या सर्व संस्थांनी परस्पर समन्वय साधत काम केले. आंतरराष्ट्रीय स्तरावरील माहितीची देवाणघेवाण, कायदेशीर प्रक्रिया आणि सुरक्षा यंत्रणांचा समन्वय यामुळे आरोपीला भारतात आणणे शक्य झाले.

राहुल काळोखेच्या अटकेनंतर सिस्पे घोटाळ्यातील तपास अधिक वेगाने पुढे जाण्याची शक्यता व्यक्त केली जात आहे. या प्रकरणामुळे आर्थिक फटका बसलेल्या हजारो पीडितांना न्याय मिळण्याची आशा पुन्हा निर्माण झाली आहे. तसेच या घोटाळ्यात सहभागी असलेल्या इतर आरोपींची भूमिका, आर्थिक व्यवहारांचे धागेदोरे आणि संभाव्य नवीन खुलासे तपासातून समोर येण्याची शक्यता असल्याने या प्रकरणाकडे राज्यभराचे लक्ष लागले आहे.

कोयना धरण "छत्रपती शिवाजी महाराज कोयना जलसागर' नावाने ओळखले जाणार. मंत्री विखे पाटील यांची माहीती,महायुती सरकारचा महत्त्वपूर्ण निर्णय

कोयना धरण  "छत्रपती शिवाजी महाराज कोयना जलसागर' नावाने ओळखले जाणार

मंत्री विखे पाटील यांची माहीती,महायुती सरकारचा महत्त्वपूर्ण निर्णय

अहील्यानगर 

पश्चिम महाराष्ट्राला वरदान ठरलेल्या कोयना जलसागराचे  "छत्रपती शिवाजी महाराज कोयना जलसागर" असे नामांतर करण्याचा महत्वपूर्ण आणि ऐतिहसिक निर्णय मुख्यमंत्री देवेंद्र फडणवीस यांच्या नेतृत्वाखाली महायुती सरकारने  घेतला असल्याची माहीती जलसंपदा मंत्री ना राधाकृष्ण विखे पाटील यांनी दिली.

कोयना जलसागरास यापुर्वी शिवाजी जलसागर या नावाने संबोधले जात होते.मात्र छत्रपती शिवाजी महाराजांचा एकेरी उल्लेख योग्य नसल्याने नावामध्ये बदल करून छत्रपती शिवाजी महाराजांचे पूर्ण नाव  कोयना जलशायला द्यावे आशी मागणी होत होती.

जलसंपदा मंत्री डॉ राधाकृष्ण विखे पाटील यांनी याबाबत पुढाकार घेवून मुख्यमंत्री देवेंद्र फडणवीस यांना जलशयाचे नामांतर करण्याबाबत विनंती केली होती.

महायुती सरकारने याबाबतचा शासन आदेश जारी करून कोयना जलसागरास  नाव छत्रपती शिवाजी महाराज कोयना जलसागर असे करण्याचा महत्वपूर्ण निर्णय जाहीर केल्याचे जलसंपदा मंत्री ना.राधाकृष्ण विखे यांनी सांगितले.

जलसागराचे नामांतर करण्याची शिवप्रेमी नागरीकांची मागणी आणी जलसंपदा विभागाच्या प्रस्तावाचा सकारात्मक विचार करून मुख्यमंत्री देवेंद्र फडणवीस यांनी घेतलेल्या निर्णयाबद्दल मंत्री विखे पाटील यांनी आभार मानले आहेत.

गुरुपौर्णिमा उत्सवाच्या प्रथमदिनी श्री साईबाबांच्या चरणी सुवर्ण मुकुट व सुवर्ण 'ॐ' दान

गुरुपौर्णिमा उत्सवाच्या प्रथमदिनी श्री साईबाबांच्या चरणी सुवर्ण मुकुट व सुवर्ण 'ॐ' दान

श्री साईबाबांवर देश-विदेशातील लाखो भाविकांची अढळ श्रद्धा असून, भक्तिभावाने ते श्री साईबाबांच्या चरणी विविध प्रकारचे दान अर्पण करत असतात. आज गुरुपौर्णिमा उत्सवाच्या प्रथम दिनी, मंगळवार दि. २८ जुलै २०२६ रोजी, मध्यप्रदेश राज्‍यातील जबलपूर येथील साईभक्त श्री. ए. के. शर्मा यांनी श्री साईबाबांच्या चरणी ४८ ग्रॅम वजनाचा आकर्षक नक्षीकाम असलेला सुवर्ण मुकुट अर्पण केला. या सुवर्ण मुकुटाची किंमत रुपये ६ लाख २८ हजार ७५२ इतकी आहे.

तसेच, गुजरात राज्यातील वडोदरा येथील साईभक्त श्री. विजय बालकृष्ण नाईक यांनी श्री साईबाबांच्या चरणी २५.५३० ग्रॅम वजनाचे दोन आकर्षक सुवर्ण 'ॐ' अर्पण केले. या सुवर्ण 'ॐ'ची किंमत रुपये ३ लाख ३४ हजार ४१७ इतकी आहे.

भाविकांकडून अर्पण करण्यात आलेले हे सुवर्ण अलंकार त्यांच्या श्री साईबाबांप्रती असलेल्या अढळ श्रद्धेचे, निस्सीम भक्तीचे आणि समर्पण भावनेचे प्रतीक आहेत.

यावेळी श्री साईबाबा संस्थानच्या वतीने उप मुख्य कार्यकारी अधिकारी श्री. भिमराज दराडे यांनी दानशूर साईभक्तांचा सत्कार करून त्यांच्या भक्तीभावाबद्दल कृतज्ञता व्यक्त केली.

मराठा आरक्षण कक्ष पूर्ण क्षमतेने कार्यान्वित करा-ना.विख पाटील मराठा आरक्षण उपसमितीची बैठक संपन्न

मराठा आरक्षण कक्ष पूर्ण क्षमतेने कार्यान्वित करा-ना.विख पाटील

मराठा आरक्षण उपसमितीची बैठक संपन्न 

अहील्यानगर  

मराठा आरक्षण कक्षाचे कामकाज अधिक गतिमान आणि प्रभावी करण्यासाठी पुढील सात दिवसांमध्ये  आवश्यक अधिकारी व कर्मचाऱ्यांची पदे भरून हा कक्ष पूर्ण क्षमतेने कार्यान्वित करण्याचे   निर्देश जलसंपदा तथा मराठा आरक्षण उपसमितीचे अध्यक्ष डॉ राधाकृष्ण विखे पाटील यांनी दिले.

 

मराठा समाजाच्या सामाजिक, शैक्षणिक व आर्थिक स्थितीबाबत तसेच इतर संलग्न बाबींवरील शिफारशींच्या अंमलबजावणीचा आढावा घेण्यासाठी मा.ना.डॉ. राधाकृष्ण विखे पाटील  यांच्या अध्यक्षतेखाली आज मंत्रिमंडळ उपसमितीची महत्त्वपूर्ण बैठक पार पडली. या बैठकीस उच्च व तंत्र शिक्षण मंत्री चंद्रकांत  पाटील, सहकार मंत्री  बाबासाहेब पाटील यांच्यासह  विषयाशी संबंधित सचिव तसेच वरिष्ठ अधिकारी उपस्थित होते. या बैठकीत मराठा समाजाशी संबंधित प्रलंबित विषय आणि शैक्षणिक सवलती व सोयी-सुविधांबाबतचा आढावा घेवून अंमलबजावणी बाबत कार्यवाही करण्याच्या सूचना देण्यात आल्या.

मराठा समाजातील विद्यार्थ्यांना इतर मागासवर्गीय (ओबीसी) विद्यार्थ्यां प्रमाणे सर्व शैक्षणिक सवलती व सोयी-सुविधा देण्याबाबत सामान्य प्रशासन विभागाच्या दि. ०५.०६.२०२६ च्या शासन निर्णयाची सर्व संबंधित प्रशासकीय विभागांनी विनाविलंब व तात्काळ अंमलबजावणी करावी, असे स्पष्ट निर्देश मंत्री विखे पाटील यांनी दिले.

छत्रपती संभाजीनगर विभागातील सर्व जिल्ह्यांमध्ये प्रलंबित असलेल्या जात प्रमाणपत्र व जात वैधता प्रमाणपत्रांच्या सर्व प्रकरणांचा निपटारा तातडीने व प्राधान्यक्रमाने करावा.

तालुकास्तरीय वंशावळ समितीस मुदतवाढ देण्याबाबतचे आदेश तात्काळ निर्गमित करण्याचे आदेश  सामाजिक न्याय विभागाला बैठकीत  देण्यात आले आहेत.

अधिसंख्य पदांवर नियुक्त करण्यात आलेल्या कर्मचाऱ्यांच्या नियमित सेवा विषयक लाभांबाबत प्रलंबित असलेली कार्यवाही तातडीने पूर्ण करावी.अर्थिकदृष्ट्या दुर्बल घटक प्रवर्गातून निवड झालेल्या परंतु मराठा आरक्षण लागू झाल्यामुळे नियुक्ती न दिलेल्या उमेदवारांच्या प्रश्नाबाबत सामान्य प्रशासन विभाग, ऊर्जा विभाग व सर्व संबंधित विभागांनी सर्व कायदेशीर बाबी तपासून पुढील आवश्यक ती कार्यवाही करावी करण्याच्या सूचनाही बैठकीत देण्यात आल्या.

पोलीस उपनिरीक्षक परीक्षा २०१७ मधील बाधित महिला उमेदवारांच्या प्रश्नावर तोडगा काढण्यासाठी अप्पर मुख्य सचिव (सेवा), अप्पर मुख्य सचिव (गृह) आणि सचिव (सामाजिक विकास समन्वय ) यांनी एकत्रित बैठक घेऊन संबंधित महिला उमेदवारांना आपली बाजू मांडण्यासाठी संधी द्यावी, असे निर्देश देण्यात आले आहेत.

गुन्हेगारांना कोणतीही मुभा नाही; आरोपीचे अतिक्रमित घर हटवणार, मंदिर परिसरासाठी नवे धोरण जाहीर होणार : डॉ. सुजय विखे पाटील

गुन्हेगारांना कोणतीही मुभा नाही; आरोपीचे अतिक्रमित घर हटवणार, मंदिर परिसरासाठी नवे धोरण जाहीर होणार : डॉ. सुजय विखे पाटील

शिर्डी 

शिर्डीतील खून प्रकरणाच्या पार्श्वभूमीवर शहरातील कायदा-सुव्यवस्था अधिक कडक करण्यासाठी तसेच मंदिर परिसरातील अनधिकृत व्यवसाय आणि अतिक्रमणांवर कायमस्वरूपी तोडगा काढण्यासाठी महत्त्वाचे निर्णय घेण्यात येणार असल्याची घोषणा भाजप प्रदेश उपाध्यक्ष डॉ. सुजय विखे पाटील यांनी केली. खून प्रकरणातील आरोपी राहत असलेल्या अतिक्रमित घराला नोटीस बजावण्यात आली असून, आठवडाभरात अतिक्रमण हटवले नाही तर नगरपंचायतीमार्फत जेसीबीच्या साहाय्याने ते हटविण्यात येईल, असा स्पष्ट इशारा त्यांनी दिला.

डॉ. विखे पाटील म्हणाले की, शिर्डीत घडलेली हत्या अत्यंत दुर्दैवी असून, गुन्हेगारांना कोणत्याही परिस्थितीत पाठीशी घातले जाणार नाही. कायद्यापुढे सर्व समान आहेत आणि नियमानुसार कारवाई प्रत्येकावर केली जाईल. संबंधित आरोपीला अतिक्रमणाबाबत नोटीस देण्यात आली असून, मुदतीत कारवाई न झाल्यास प्रशासन स्वतः अतिक्रमण हटविण्याची प्रक्रिया राबवेल, असे त्यांनी स्पष्ट केले.

मंदिर परिसरातील अनधिकृत विक्रीला आळा घालण्यासाठी स्वतंत्र हॉकर झोन विकसित करण्यात येणार असल्याचे त्यांनी सांगितले. साई मंदिराच्या चारही बाजूंच्या परिसरात कोणत्याही प्रकारची विक्री करण्यास परवानगी दिली जाणार नसून, पथविक्रेत्यांसाठी स्वतंत्र जागा निश्चित करण्यात येईल. कोण व्यवसाय करू शकतो, कोणत्या ठिकाणी व्यवसाय करता येईल आणि कोणत्या वस्तूंची विक्री करता येईल, याबाबतची सविस्तर नियमावली ग्रामस्थ, व्यापारी आणि संबंधित घटकांच्या सहभागातून तयार करण्यात येणार आहे.

मंदिर परिसरात भाविकांची फसवणूक करणारे, जादा दर आकारणारे किंवा अनधिकृत व्यवसाय करणाऱ्यांविरोधात कठोर कारवाई केली जाईल, असे सांगत डॉ. विखे पाटील म्हणाले की, अशा प्रकरणात केवळ विक्रेत्यावरच नव्हे, तर संबंधित दुकानमालक आणि जागामालकावरही गुन्हे दाखल करण्यात येतील. गरीब विक्रेत्यांवर कारवाई करून प्रश्न सुटणार नाही; त्यामागील मूळ सूत्रधारांवरही कायदेशीर कारवाई झाली पाहिजे, अशी भूमिका त्यांनी मांडली.

मंदिर परिसरातील फुले, प्रसाद, शाल आणि इतर पूजासाहित्याच्या विक्रीबाबत साई संस्थानने स्पष्ट धोरण जाहीर करण्याची गरज असल्याचेही त्यांनी नमूद केले. संस्थानने कोणत्या वस्तूंना परवानगी असेल आणि कोणत्या वस्तू मंदिरात स्वीकारल्या जातील, याबाबत ठोस निर्णय घेतल्यास भाविकांची लूट आणि अनधिकृत विक्रीला मोठ्या प्रमाणात आळा बसेल, असे त्यांनी सांगितले.

पथविक्रेत्यांसाठीची अंतिम नियमावली येत्या आठवडाभरात ग्रामस्थांच्या बैठकीनंतर जाहीर करण्यात येणार असल्याचे त्यांनी स्पष्ट केले. वारंवार व्यवसाय बंद-चालू करण्याऐवजी सर्वांना न्याय देणारा आणि कायमस्वरूपी तोडगा काढण्यावर भर दिला जाईल, असेही त्यांनी सांगितले.

यावेळी डॉ. विखे पाटील यांनी शिर्डी पोलिसांच्या कामगिरीचे कौतुक करत, खून प्रकरणातील आरोपींना तातडीने अटक करण्यात पोलिसांना यश आल्याचे नमूद केले. शिर्डीत गुन्हेगारी प्रवृत्तीच्या व्यक्तींना कोणतीही मुभा दिली जाणार नाही. भाविकांची सुरक्षितता, शहरातील शिस्त आणि कायदा-सुव्यवस्था अबाधित ठेवण्यासाठी आवश्यक ते सर्व कठोर निर्णय राबविले जातील, असा ठाम विश्वास त्यांनी व्यक्त केला.

लायन्स क्लब ऑफ राहाताच्या 2026-27 कार्यकारिणीचा भव्य शपथविधी सोहळा उत्साहात संपन्न

लायन्स क्लब ऑफ राहाताच्या 2026-27 कार्यकारिणीचा भव्य शपथविधी सोहळा उत्साहात संपन्न

राहाता 

- समाजसेवा, मानवता आणि सामाजिक बांधिलकीचा अखंड वारसा जपत लायन्स क्लब ऑफ राहाता यांच्या 2026-27 या वर्षातील नव्या कार्यकारिणीचा 8 वा Induction and Installation Ceremony अत्यंत उत्साहपूर्ण, दिमाखदार आणि प्रेरणादायी वातावरणात संपन्न झाला. नव्या पदाधिकाऱ्यांनी समाजसेवेची शपथ घेत समाजहितासाठी निष्ठेने कार्य करण्याचा दृढ संकल्प व्यक्त केला.

यावेळी अध्यक्ष म्हणून लायन उमेश शेटे, सचिव म्हणून लायन दिनेश कार्ले आणि कोषाध्यक्ष म्हणून लायन खिझर शहा यांची निवड करण्यात आली. त्यांच्यासह सर्व नवनियुक्त पदाधिकाऱ्यांचा शपथविधी उत्साहपूर्ण वातावरणात पार पडला.

कार्यक्रमात मावळते अध्यक्ष ॲड. संतोष घोडके यांनी मागील वर्षभरात क्लबने राबविलेल्या विविध समाजोपयोगी उपक्रमांचा आढावा घेतला. मावळते सचिव ॲड. दिनेश कार्ले यांनी वर्षभरातील कार्याचा सविस्तर अहवाल सादर केला.

Installation Officer लायन प्रवीण गुलाटी तसेच Induction Officer लायन डॉ. संजय उबाळे यांनी सर्व नवनियुक्त पदाधिकाऱ्यांना पद व गोपनीयतेची शपथ देत समाजसेवेच्या कार्यासाठी प्रेरित केले. प्रविण गुलाटी यांनी लायन्स बद्दल माहिती दिली व सर्व लायन्स सभासद यांनी समाजासाठी ,गरजू मुलांसाठी, वयोवृद्ध व्यक्ती यांना मदत करून चांगल्या अँक्टिव्हिटी करणेबाबत आव्हान केले

कार्यक्रमामध्ये ग्रॅज्युएट चहा चे संस्थापक अध्यक्ष तथा सर्वेसर्वा लायन श्री. निलेश जाधव सर यांनी कीनोट स्पीकर म्हणून उपस्थितांना मार्गदर्शन करताना अत्यंत प्रभावी, प्रेरणादायी आणि स्फूर्तीदायक भाषण केले. त्यांच्या विचारांनी उपस्थितांमध्ये सेवाभाव, नेतृत्व आणि सामाजिक बांधिलकीची नवी ऊर्जा निर्माण केली.

यावेळी रीजन चेअरमन ॲड. संदीप गोंदकर आणि झोन चेअरमन लायन अक्षय गिरमे यांनी आपल्या मनोगतात लायन्स क्लब ऑफ राहाता यांनी केलेल्या समाजोपयोगी कार्याचे मनापासून कौतुक केले. लायन डॉ. संजय उबाळे यांच्या मार्गदर्शनाखाली क्लबने जिल्हा पातळीवर उल्लेखनीय कार्य करून आपली वेगळी ओळख निर्माण केली असल्याचे गौरवोद्गार ॲड. संदीप गोंदकर यांनी काढले. तसेच नव्या कार्यकारिणीला आगामी वाटचालीसाठी मनःपूर्वक शुभेच्छा दिल्या.

कार्यक्रमाचे प्रास्ताविक डॉ. संजय गायकवाड यांनी केले.

यावेळी लायन्स क्लबचे ज्येष्ठ सदस्य लायन डॉ. एकनाथ गोंदकर, लायन प्रकाश सदाफळ, डॉ. संजय गायकवाड, ॲड. गोरखभाऊ दंडवते, लायन अंजली उबाळे आणि लायन संध्याताई कार्ले यांची प्रमुख उपस्थिती लाभली.

मागील कार्यकारिणीतील उपाध्यक्ष लायन मुन्नाभाई शहा, लायन राजेंद्र बांगर तसेच सचिव लायन रतन चौधरी यांनी वर्षभरातील समाजोपयोगी उपक्रमांची माहिती देत सर्व सदस्यांचे आभार मानले.

यावेळी लायन्स क्लब शिर्डीचे अध्यक्ष श्री महेश वैद्य, विजय थोरात, विकास शिवगजे, अनिल दोरवाणी, लायन्स क्लब श्रीरामपूरचे राहुल होले तसेच लायन्स क्लब कोपरगावचे PST तसेच राहाता येथील गुंतवणूक तज्ञ आणि साई चरित्र अभ्यासक श्री रवींद्र जोशी तसेच श्री संजय भणगे, विजय निरगुडे, चंद्रशेखर सोनी, हर्षल चोळके, शैलेश सोळंकी, रुचिका कोरडे, प्रकाश भोसले, सतीश गोरडे, श्री व सौ. ऋषीराज नळे, खंडेराव शेटे, श्री व सौ. संदीप शेटे, राजुभाऊ शेटे, श्री व सौ. गणेश लांडगे, रवी बनसोडे, उर्मिला हासे आणि सविता काळे यांची विशेष उपस्थिती लाभली.

या भव्य कार्यक्रमाच्या यशस्वी आयोजनासाठी सरला तायडे, श्वेता कार्ले, स्मिता मुरादे, सुनील हासे, साहेबराव गायकवाड आणि सोहन उबाळे यांनी विशेष परिश्रम घेतले.

कार्यक्रमाचे प्रभावी सूत्रसंचालन सरला तायडे यांनी केले, तर सोहन उबाळे यांनी उपस्थित मान्यवर, सदस्य आणि पाहुण्यांचे आभार मानले.

यावेळी लायन डॉ. संजय उबाळे यांना मागील वर्षी झोन चेअरमन म्हणून केलेल्या उल्लेखनीय, प्रभावी आणि समाजाभिमुख कार्याची दखल घेत Multiple Council कडून प्रदान करण्यात आलेले Appreciation Certificate लायन प्रवीण गुलाटी यांच्या हस्ते प्रदान करण्यात आले. उपस्थितांनी टाळ्यांच्या कडकडाटात त्यांचे अभिनंदन करत त्यांच्या सेवाभावी कार्याचा गौरव केला.

कार्यक्रमानंतर सर्वांनी स्नेहभोजनाचा आस्वाद घेत परस्परांतील आपुलकी, सेवाभाव आणि सामाजिक बांधिलकी अधिक दृढ केली.

समाजहित, सेवाभाव आणि मानवतेची अखंड ज्योत प्रज्वलित ठेवत लायन्स क्लब ऑफ राहाता नव्या कार्यकारिणीच्या नेतृत्वाखाली आगामी वर्षातही अधिक जोमाने समाजोपयोगी उपक्रम राबवेल, असा दृढ विश्वास उपस्थित मान्यवरांनी व्यक्त केला. समाजसेवेची ही अखंड परंपरा अशाच उत्साहाने आणि समर्पणाने पुढे नेण्याचा निर्धार यावेळी सर्व पदाधिकाऱ्यांनी व्यक्त केला.

आशा सेविका सौ. राधा गोर्डे यांचा सेवा निवृती सोहळा एक भावनिक क्षण.

आशा सेविका सौ. राधा गोर्डे यांचा सेवा निवृती सोहळा एक भावनिक क्षण.

 संगमनेर तालुक्यातील तळेगाव PHC मधील पहिल्या आशा कर्मचारी सौ. राधा गोर्डे यांचा सेवा निवृती सोहळा तळेगाव येथील प्राथमिक आरोग्य केंद्रात प्राथमिक आरोग्य केंद्राचे आरोग्य अधिकारी डॉ. एकनाथ मुंगसे यांच्या अध्यक्षते खाली व आशा सुपरवायझर यांचे प्रमुख उपस्थीतीत नुकताच संपन्न झाला.

सौ. राधा गोर्डे यांनी आपल्या कार्यकाळात अनेक वर्ष मातृ शिशु आरोग्य लसीकरण जन जागृती ग्राम सेवेसाठी निस्वार्थपणे कार्य करून समाजासाठी प्रेरणादायी योगदान दिले.

कोराना काळात स्वताच्या जिवाची पर्वा न करता घरोघरी जाऊन त्यांनी कोरोना रुग्नाची सेवा केली.

या प्रसंगी आशा कर्मचारी संघटनेच्या कॉम्रेड उषा दिघे यांनी सेवा निवृत्ती नंतर आशा कर्मचारी यांना शासनाने कुठलेही आर्थिक सहाय्य केले नाही या विषई आपली खंत बोलून दाखवली.

आशा कर्मचारी निवृत्त झाल्या नंतर तिला शासनाने पेंशन नाही तर किमान अंगणवाडी सेविके प्रमाने एकलाख रुपये द्यावे म्हणजे तिला भविष्यात त्या रकमेचा आपल्या स्वताच्या गरजा भागविता येतील असे त्या म्हणाल्या.

आशा कर्मचारी संघटनेचे जनरल सेक्रेटरी अॅड. कॉ . सुधिर टोकेकर यांनी सौ राधा गोर्डे यांना सेवा निवृतीच्या शुभेच्छा संदेश पाठऊन आपल्या भावना कळविल्या.

आशा कर्मचारी संघटनेचे जिल्हा कार्याध्यक्ष कॉ. सुरेश पानसरे यांनी सेवानिवृत्त झालेल्या आशांन साठी शासन स्तरावर संघटना करत असलेल्या पेंशन अथवा एक रकमी काही तरी मोबदला मिळावा या साठी संघटना प्रयत्नशील असल्याचे सांगुन सौ. गोर्डे यांना सेवा निवृत्ती नंतर दिर्घ आयुआरोग्याच्या शुभेच्छा आपल्या शुभेच्छा संदेशात दिल्या.

सौ राधा गोर्डे या क्षणांनी सर्व आशा कर्मचारी यांनी दिलेल्या शुभेच्छा व निरोप यांनी भावना विवष झाल्या होत्या.

त्यांनी या प्रमा बद्दल सर्वांचे आभार मानले.

सदर कार्यक्रमास ओ एन एम श्रीमती एम . पी माळी श्रीमती कदम श्रीमती तांदळे श्रीमती पुजा बांगर श्रीमती अंजली मिसाळ आहेर मॅडम मंगल सोनवणे मंगल वाणी प्रतिमा सुपेकर मंगल गायकवाड सविता डोंगरे तसेच तळेगाव प्राथमिक आरोग्य केंद्र अंत्तरगातील सर्व आशा सेविका उपस्थीत होत्या. शेवटी आशा सुपरवायझर सौ. आरती चांडोले यांनी सर्वांचे आभार मानले.

प्रामाणिकपणाचा प्रेरणादायी आदर्श : साईभक्ताच्या सतर्कतेमुळे ₹१५,४१० ची पर्स मालकाला सुखरूप परत

प्रामाणिकपणाचा प्रेरणादायी आदर्श 

: साईभक्ताच्या सतर्कतेमुळे ₹१५,४१० ची पर्स मालकाला सुखरूप परत

श्री साईबाबा संस्थानच्या संरक्षण विभागाने आजवर ₹८५ लाखांहून अधिक किमतीच्या हरवलेल्या वस्तू परत करून जपला भक्तांच्या विश्वासाचा ठेवा

श्री साईबाबांच्या दर्शनासाठी देश-विदेशातून लाखो भाविक शिर्डीत येत असतात. श्रद्धा आणि भक्तीभावाने ते साईचरणी आपली सेवा अर्पण करतात. या भाविकांना सुरक्षित, सुलभ आणि सुखद दर्शन मिळावे, तसेच त्यांच्या मालमत्तेचीही संपूर्ण सुरक्षितता राखली जावी, यासाठी श्री साईबाबा संस्थानचा संरक्षण विभाग अहोरात्र कार्यरत आहे. हरवलेल्या वस्तूंचा शोध घेऊन त्या त्यांच्या मूळ मालकांपर्यंत प्रामाणिकपणे पोहोचविण्याच्या कार्यातून संरक्षण विभागाने सेवाभाव, पारदर्शकता आणि प्रामाणिकतेचा एक अनुकरणीय आदर्श निर्माण केला आहे.

आजपर्यंत संरक्षण विभागाने सुमारे ₹८५ लाखांहून अधिक किमतीची रोख रक्कम, दागिने, महिलांच्या पर्स, मोबाईल, घड्याळे तसेच इतर मौल्यवान वस्तू संबंधित साईभक्तांना सुरक्षितपणे परत केल्या आहेत. संरक्षण विभागाच्या या उल्लेखनीय कार्याची विविध प्रसारमाध्यमांनी वेळोवेळी दखल घेत त्यांचे कौतुकही केले आहे.

सध्या शिर्डीत गुरुपौर्णिमा महोत्सवाची जय्यत तयारी सुरू असून उद्यापासून महोत्सवाला प्रारंभ होत आहे. त्यामुळे मंदिर परिसरात भाविकांची मोठी गर्दी होत आहे. अशा गर्दीच्या वातावरणातही आज प्रामाणिकपणाचा एक प्रेरणादायी प्रसंग घडला.

आज श्री साईबाबा मंदिरातील पारायण कक्षात पारायण करत असताना सौ. अनुपमा निरंजन (रा. बेंगळुरू) यांना एक पर्स आढळून आली. सदर पर्समध्ये ₹१५,४१०/- रोख रक्कम तसेच आधार कार्ड होते. कोणताही मोह न बाळगता त्यांनी ती पर्स तत्काळ श्री साईबाबा संस्थानच्या संरक्षण कार्यालयात जमा केली.

संरक्षण विभागाने पर्समधील आधार कार्डच्या आधारे चौकशी करून ती श्री जी. व्ही. राजू (रा. विशाखापट्टणम, आंध्र प्रदेश) यांची असल्याचे निष्पन्न केले. त्यानंतर मंदिर परिसरात उद्घोषणा करून संबंधित साईभक्तांना संरक्षण कार्यालयाशी संपर्क साधण्याचे आवाहन करण्यात आले. काही वेळातच श्री. राजू संरक्षण कार्यालयात आले. आवश्यक पडताळणी पूर्ण करून त्यांना त्यांची पर्स आणि त्यातील ₹१५,४१०/- रोख रक्कम सुरक्षितपणे सुपूर्त करण्यात आली.

एका साईभक्ताने दाखविलेल्या प्रामाणिकपणामुळे दुसऱ्या साईभक्ताला त्याची हरवलेली रक्कम परत मिळाली. श्रद्धा, सचोटी आणि मानवतेचा हा सुंदर संगम साईबाबांच्या शिकवणीचा जिवंत अनुभव देणारा ठरला.

सौ. अनुपमा निरंजन यांनी दाखविलेल्या प्रामाणिकपणा व तत्परतेमुळे श्री साईबाबा संस्थानचे मुख्य कार्यकारी अधिकारी मा. श्री. गोरक्ष गाडीलकर यांनी त्यांचा सत्कार करून विशेष अभिनंदन केले.

संरक्षण विभाग प्रमुख श्री. रोहिदास माळी यांच्या नेतृत्वाखाली संरक्षण विभागातील अधिकारी व कर्मचारी मंदिर परिसर, भक्तनिवास आणि संस्थानच्या विविध ठिकाणी सापडलेल्या हरवलेल्या वस्तू त्यांच्या मूळ मालकांपर्यंत पोहोचविण्याचे कार्य सातत्याने करत आहेत. मुख्य कार्यकारी अधिकारी मा. श्री. गोरक्ष गाडीलकर यांच्या मार्गदर्शनाखाली संस्थानचा प्रत्येक कर्मचारी साईभक्तांना सुरक्षित, सुलभ आणि आनंददायी दर्शनाचा अनुभव मिळावा यासाठी समर्पित भावनेने सेवा बजावत आहे.

"साईसेवा व मानवसेवा" या ब्रीदवाक्याला साजेशी ही घटना केवळ हरवलेली पर्स परत मिळाल्याची नसून, श्रद्धा, प्रामाणिकपणा आणि विश्वास यांचे जतन करणाऱ्या श्री साईबाबा संस्थानच्या सेवाभावी कार्याचा आणखी एक प्रेरणादायी अध्याय ठरली आहे.

सत्तेतील आमदार असलात तरी लोकहितासाठी वेळप्रसंगी प्रशासनाविरोधात आंदोलन करा; डॉ. सुजय विखे पाटील यांचा आमदार विठ्ठलराव लंघे पाटील यांना सल्ला

सत्तेतील आमदार असलात तरी लोकहितासाठी वेळप्रसंगी प्रशासनाविरोधात आंदोलन करा; डॉ. सुजय विखे पाटील यांचा आमदार विठ्ठलराव लंघे पाटील यांना सल्ला

नेवासा 

अधिकारी जनतेची कामे वेळेत करत नसतील, तर सत्ताधारी पक्षाचे आमदार असले तरी लोकहितासाठी वेळप्रसंगी प्रशासनाविरोधात आंदोलन करण्यास घाबरू नये, असा स्पष्ट सल्ला भाजपा प्रदेश उपाध्यक्ष डॉ. सुजय विखे पाटील यांनी नेवासाचे आमदार विठ्ठलराव लंघे यांना दिला. सत्ता आणि पदापेक्षा जनता मोठी असून, लोकांनी निवडून दिलेले प्रतिनिधी हे जनतेच्या प्रश्नांसाठी लढण्यासाठीच असतात, असे प्रतिपादन त्यांनी केले.

नेवासा येथे छत्रपती शिवाजी महाराज महाराजस्व शिबिर अभियानाचा शुभारंभ यावेळी मान्यवरांचा उपस्थितीत करण्यात आला. त्या आयोजित कार्यक्रमात बोलताना डॉ. विखे पाटील म्हणाले, अधिकारी काम करत नसतील, तर आंदोलन करा. तुम्ही सत्तेत असलात, महायुतीचे आमदार असलात तरी लोकांच्या प्रश्नांसाठी आंदोलन करण्यास मागे-पुढे पाहू नका. तुम्ही आंदोलन केले तर मी स्वतः तुमच्यासोबत येईन. माझे वडील पालकमंत्री असले तरी मी जनतेच्या प्रश्नांसाठी आंदोलनात सहभागी होईन. प्रशासनाने कोणत्याही दबावाला बळी न पडता प्रामाणिकपणे जनतेची कामे करावीत, असेही त्यांनी स्पष्ट केले.यावेळी नगराध्यक्ष करण घुले तसेच शासकीय अधिकारी महायुतीचे पदाधिकारी कार्यकर्ते लाभार्थी मोठ्या संख्येने उपस्थित होते.

अधिकाऱ्यांना उद्देशून ते म्हणाले की, पूर्वी ज्या पद्धतीने काम चालत होते, ती कार्यपद्धती आता बदलण्याची वेळ आली आहे. सर्वसामान्य नागरिकांशी सन्मानाने वागावे, त्यांच्या प्रश्नांना प्राधान्य द्यावे आणि त्यांना शासकीय कार्यालयांचे हेलपाटे मारायला लावू नयेत. जनतेला तुमची खुर्ची किंवा गाडी नको आहे, त्यांना वेळेत न्याय आणि सन्मानाची वागणूक हवी आहे, असे ते म्हणाले.

पुढे बोलताना ते म्हणाले की नेवासा तालुका गुन्हेगारीमुक्त करण्यासाठी कोणत्याही प्रकारची तडजोड केली जाणार नसून, महिलांवरील अत्याचार, बलात्कार, खून यांसारख्या गंभीर गुन्ह्यांतील आरोपींविरोधात कठोर कारवाई केली जाईल. गुन्हेगारांच्या मतांसाठी तत्त्वांशी तडजोड करण्याचा प्रश्नच उद्भवत नाही. त्याचबरोबर शासनाच्या योजना तळागाळातील नागरिकांपर्यंत प्रभावीपणे पोहोचविण्यासाठी राबविण्यात येत असलेल्या छत्रपती शिवाजी महाराज महाराजस्व समाधान शिबिर अभियानाच्या माध्यमातून हजारो नागरिकांना दिलासा मिळत असल्याचे प्रतिपादन भाजपचे प्रदेश उपाध्यक्ष डॉ. सुजय विखे पाटील यांनी केले.

यावेळी बोलताना डॉ. विखे पाटील म्हणाले की, छत्रपती शिवाजी महाराज महाराजस्व समाधान शिबिर अभियानाच्या च्या माध्यमातून अवघ्या एका महिन्यात पाच हजारांहून अधिक नागरिकांना विविध शासकीय योजनांचा लाभ मिळाला आहे. शासनाच्या सेवा व सुविधा नागरिकांच्या दारापर्यंत पोहोचविण्यासाठी हे अभियान प्रभावी ठरत असून, सर्वसामान्यांना शासकीय कार्यालयांचे हेलपाटे मारावे लागू नयेत, यासाठी महायुती सरकार कटिबद्ध असल्याचे त्यांनी सांगितले.

कार्यकर्त्यांना मार्गदर्शन करताना त्यांनी पदापेक्षा जनतेची सेवा महत्त्वाची असल्याचे सांगितले. पद मिळविण्यापेक्षा गरिबांचे प्रश्न सोडविणे हेच सर्वात मोठे कार्य आहे. समाजसेवा करणाऱ्यालाच जनता कायम साथ देते,असे सांगत पदाच्या राजकारणात न अडकता जनतेची कामे करण्याचे आवाहन त्यांनी केले.

नेवासा तालुक्यातील रस्ते, जमीनविषयक वाद आणि महसूल प्रकरणे तातडीने निकाली काढण्यासाठी महसूल प्रशासनाने घटनास्थळी जाऊन निर्णय घ्यावेत, अशी अपेक्षा त्यांनी व्यक्त केली. अधिकारी काम करत नसतील, तर लोकप्रतिनिधींनीही जनतेच्या प्रश्नांसाठी आंदोलन करण्यास मागे-पुढे पाहू नये. सत्ता नव्हे, तर जनता मोठी असते, असेही त्यांनी स्पष्ट केले.

आमदार विठ्ठलराव लंघे पाटील यांनी सांगितले की, तालुक्यातील ११ मंडळांमध्ये आयोजित २२ शिबिरांमधून सुमारे ७ हजार ५०० नागरिकांना विविध शासकीय योजनांचा लाभ देण्यात आला. डिजिटल सातबारा, वारस नोंद, फेरफार यांसह महसूल विभागाच्या विविध सेवा एकाच ठिकाणी उपलब्ध करून देण्यात आल्या. यासाठी १३ विविध शासकीय विभागांचे स्टॉल उभारण्यात आले होते.

महिला सक्षमीकरणाबाबत माहिती देताना त्यांनी सांगितले की, तालुक्यात २ हजार ३५ बचत गट कार्यरत असून त्यामध्ये २५ हजार ५०० महिला सहभागी आहेत. अधिकाधिक महिला बचत गट स्थापन करून महिलांना आर्थिकदृष्ट्या सक्षम करण्याचा प्रयत्न केला जाणार असल्याचेही त्यांनी सांगितले.

नेवासा शहरातील अनेक वर्षांपासून प्रलंबित असलेल्या अतिक्रमणधारकांच्या प्रश्नावर संबंधित विभागांची संयुक्त बैठक घेऊन तोडगा काढण्यात येईल. तसेच तालुक्यातील सिंचन आणि पाणी नियोजनासाठी पालकमंत्री राधाकृष्ण विखे पाटील यांनी केलेल्या प्रयत्नांचेही आमदार लंगे पाटील यांनी कौतुक केले.

आरोग्य सेवांबाबत बोलताना त्यांनी प्राथमिक आरोग्य केंद्रांमध्ये स्थानिक पातळीवर अधिकाधिक उपचार उपलब्ध करून देण्यावर भर दिला. गंभीर रुग्णांना उच्चस्तरीय रुग्णालयात तातडीने उपचारासाठी पाठविण्याची सक्षम व्यवस्था उभारली जात असून, नव्याने बांधण्यात आलेल्या वैद्यकीय अधिकारी निवासस्थानी डॉक्टर वास्तव्यास राहतील, याचीही दक्षता घेण्यात येणार असल्याचे त्यांनी स्पष्ट केले.

संघर्षातून पुढे आलेले नेतृत्वच विकासाला गती देऊ शकते, असे सांगत डॉ. सुजय विखे पाटील यांनी आमदार विठ्ठलराव लंघे पाटील यांच्या कार्याचे कौतुक केले. महायुती सरकारच्या माध्यमातून नेवासा तालुक्यातील सर्व प्रलंबित विकासकामे पूर्ण करण्यासाठी आवश्यक निधी व पाठबळ दिले जाईल, अशी ग्वाही त्यांनी दिली.

नेवासा शहराच्या सर्वांगीण विकासासाठी लवकरच विस्तृत बैठक घेण्यात येणार असून, अतिक्रमण नियमितीकरण, शहर विकास आणि गुन्हेगारीवर नियंत्रण यासाठी ठोस निर्णय घेतले जातील. अतिक्रमण आणि अवैध व्यवसायांमधून अनेकदा गुन्हेगारीला खतपाणी मिळते. त्यामुळे अशा प्रवृत्तींवर कठोर कारवाई करून नेवासा तालुका गुन्हेगारीमुक्त करण्यासाठी प्रशासन आणि लोकप्रतिनिधी एकत्रितपणे काम करतील, असा विश्वास डॉ. सुजय विखे पाटील यांनी व्यक्त केला.

सावळी विहीर खुर्दच्या विकासकामांचा डॉ. सुजय विखे पाटील यांच्याकडून सखोल आढावा; पशुवैद्यकीय महाविद्यालय व एमआयडीसी परिसराची प्रत्यक्ष पाहणी

सावळी विहीर खुर्दच्या विकासकामांचा डॉ. सुजय विखे पाटील यांच्याकडून सखोल आढावा; पशुवैद्यकीय महाविद्यालय व एमआयडीसी परिसराची प्रत्यक्ष पाहणी

सावळी विहीर खुर्द 

सावळी विहीर खुर्द येथे सुरू असलेल्या शैक्षणिक, औद्योगिक आणि पायाभूत विकासकामांना अधिक गती देण्याच्या उद्देशाने भाजपा प्रदेश उपाध्यक्ष डॉ. सुजय विखे पाटील यांनी सोमवारी विविध महत्त्वाच्या प्रकल्पांची प्रत्यक्ष पाहणी करत संबंधित विभागांच्या अधिकाऱ्यांकडून सविस्तर माहिती घेतली. राज्यासाठी महत्त्वपूर्ण ठरणाऱ्या पशुवैद्यकीय महाविद्यालयाच्या उभारणीपासून ते एमआयडीसी परिसरातील रस्ते, गटार, पाणीपुरवठा, पंपिंग स्टेशन, बांधकाम सुरू असलेल्या आयटीआय महाविद्यालयाच्या इमारतीची पाहणी तसेच अन्य मूलभूत सुविधांपर्यंत प्रत्येक कामाचा त्यांनी बारकाईने आढावा घेतला. यावेळी संबंधित अधिकारी, अभियंते, ठेकेदार,आणि ग्रामस्थांसमवेत विकासकामांबाबत विस्तृत चर्चा करत कामाच्या गुणवत्तेबाबत कोणतीही तडजोड केली जाणार नसल्याचे त्यांनी स्पष्ट केले.

सर्वप्रथम डॉ. सुजय विखे पाटील यांनी सावळी विहीर खुर्द येथे उभारण्यात येत असलेल्या राज्यातील महत्त्वाकांक्षी पशुवैद्यकीय महाविद्यालयाच्या कामाची पाहणी केली. पशुवैद्यकीय शिक्षण आणि संशोधनाच्या दृष्टीने अत्यंत महत्त्वपूर्ण मानल्या जाणाऱ्या या प्रकल्पामुळे राज्यातील विद्यार्थ्यांना अत्याधुनिक सुविधा उपलब्ध होणार असून पशुसंवर्धन क्षेत्रालाही नवी दिशा मिळणार आहे. महाविद्यालयाच्या मुख्य इमारतीचे काम, विविध शैक्षणिक विभाग, प्रयोगशाळा, प्रशासकीय इमारत, विद्यार्थ्यांसाठीच्या सुविधा तसेच इतर पूरक बांधकामांची प्रगती त्यांनी प्रत्यक्ष पाहून अधिकाऱ्यांकडून सविस्तर माहिती घेतली.

बांधकामाच्या प्रत्येक टप्प्यावर दर्जेदार साहित्याचा वापर झाला पाहिजे, कोणत्याही परिस्थितीत गुणवत्तेशी तडजोड होता कामा नये, प्रत्येक काम तांत्रिक निकषांनुसार आणि नियोजित वेळेत पूर्ण झाले पाहिजे, अशा स्पष्ट सूचना त्यांनी संबंधित यंत्रणेला दिल्या. पाहणीदरम्यान काही ठिकाणी आवश्यक सुधारणा सुचवत त्या तातडीने पूर्ण करण्याचे निर्देशही त्यांनी दिले. भविष्यात हजारो विद्यार्थ्यांच्या शैक्षणिक आयुष्याशी संबंधित असलेल्या या प्रकल्पात प्रत्येक बाब उच्च दर्जाची असणे आवश्यक असल्याचे त्यांनी अधोरेखित केले.

यानंतर डॉ. विखे पाटील यांनी एमआयडीसी परिसरात सुरू असलेल्या आयटीआय महाविद्यालयाच्या इमारत बांधकामाची प्रत्यक्ष पाहणी केली. औद्योगिक क्षेत्राच्या वाढत्या गरजेनुसार कुशल मनुष्यबळ तयार करण्यासाठी आधुनिक तांत्रिक शिक्षणाची आवश्यकता असून, या आयटीआय महाविद्यालयामुळे परिसरातील युवकांना दर्जेदार कौशल्य प्रशिक्षणाची संधी उपलब्ध होणार आहे. त्याचबरोबर स्थानिक रोजगारनिर्मितीला चालना मिळून उद्योगांना प्रशिक्षित मनुष्यबळ सहज उपलब्ध होण्यास मदत होणार आहे. यावेळी त्यांनी इमारतीच्या बांधकामाच्या प्रगतीचा आढावा घेत गुणवत्तेबाबत आवश्यक त्या सूचना संबंधित अधिकारी व ठेकेदारांना दिल्या.

त्यानंतर डॉ. विखे पाटील यांनी एमआयडीसी परिसरातील पाणीपुरवठा व्यवस्थेसाठी उभारण्यात आलेल्या पंपिंग स्टेशनची पाहणी केली. औद्योगिक विकासासाठी सातत्यपूर्ण आणि पुरेसा पाणीपुरवठा अत्यंत महत्त्वाचा असल्याचे सांगत त्यांनी पंपिंग स्टेशनची कार्यक्षमता, यंत्रसामग्रीची स्थिती, भविष्यातील पाण्याची गरज आणि देखभाल व्यवस्थेचा आढावा घेतला. उद्योगांना कोणत्याही परिस्थितीत पाणीटंचाईचा सामना करावा लागू नये, यासाठी आवश्यक त्या सर्व उपाययोजना वेळेत पूर्ण करण्याच्या सूचना त्यांनी संबंधित अधिकाऱ्यांना दिल्या.

यानंतर डॉ. विखे पाटील यांनी ग्रामस्थ व संबंधित विभागाच्या अधिकाऱ्यांसह सावळी विहीर खुर्द एमआयडीसी परिसराची सविस्तर पाहणी केली. औद्योगिक वसाहतीतील अंतर्गत रस्ते, गटार व्यवस्था, सांडपाणी निचरा, स्वच्छता, अतिक्रमण, वीज, पाणीपुरवठा आणि इतर मूलभूत सुविधांचा त्यांनी प्रत्यक्ष आढावा घेतला. अनेक ठिकाणी रस्त्यांची दुरवस्था, पावसाळ्यात पाणी साचण्याच्या समस्या तसेच गटार व्यवस्थेतील त्रुटी निदर्शनास आल्या. ग्रामस्थांनी विविध अडचणी मांडत तातडीने उपाययोजना करण्याची मागणी केली.

या पाहणी दौऱ्यावेळी संबंधित विभागाचे अधिकारी, अभियंते, ठेकेदार, ग्रामस्थ आणि स्थानिक पदाधिकारी मोठ्या संख्येने उपस्थित होते.

संत गाडगेबाबा विचार आत्मसात केल्यास जनसामान्यांची सेवा घडते - पाटील

संत गाडगेबाबा विचार आत्मसात केल्यास जनसामान्यांची सेवा घडते - पाटील 

वळण 

संत गाडगेबाबा यांनी जनसामान्यांसाठी आयुष्य पणाला लावले शिक्षणाची महती त्यांनी त्यावेळी सांगितली स्वच्छता,भुकेलेला अन्न, ज्यांना वस्त्र नाही त्यांना वस्त्र असं अभियान त्यांनी त्यावेळी चालवलं आणि आज त्याच विचाराने आपण जर चाललो तरी खरी जनसेवा घडेल. त्यासारख पुण्य कुठचं मिळणार नाही.

असं मत वळण (ता. राहुरी) संत गाडगेबाबा आश्रमातील अशोकराव पाटील यांनी पानेगांव येथील रहिवासी व एसटी महामंडळात श्रीरामपूर येथे कार्यरत सुनिल भवार यांचा मातोश्री 

  साखरबाई यांच्या सातव्या पुण्यस्मरण दिनानिमित्त संत गाडगेबाबा आश्रम शाळा येथे विद्यार्थ्यांसाठी स्नेहभोजन व एक पेड माॅ के नाम वृक्षारोपण करण्यात आले.

त्यावेळी मागदर्शन करताना पाटील बोलत होते.

भवार यांनी सलग तीन वेळा त्यांच्या आईच्या पुण्यस्मरण निमित्ताने हा स्नेहभोजनाचा उपक्रम जवळपास आश्रमात राबवित असून निश्चितच अभिमान वाटतो. भवार यांचा आदर्श दानशूरांनी घेवून संत गाडगेबाबा विचार आत्मसात केल्यास जनसामान्यांची सेवा घडेल आणि पुण्यरुपी आशिर्वाद मिळेल पाटील यांनी सांगितले.

सुनिल भवार यांनी आपल्या भाषणात सांगितले कि मी राहुरी येथील संत गाडगेबाबा आश्रमाचा विद्यार्थी असून तेथे सहा वर्षे शिक्षण घेतले. गाडगेबाबा मुळेच मी घडलो माझं कुटुंब घडलं म्हणून माझ्या आईचं पुण्यस्मरण दिनानिमित्त सलग तीन वर्षे पासून पुण्यस्मरणाचा कार्यक्रम संत गाडगेबाबा आश्रमात राबवित आहे.जो पर्यंत शक्य होईल तो पर्यंत हा पुण्यस्मरण निमित्ताने उपक्रम सुरु ठेवण्याचा संकल्प भवार यांनी केला. 

कार्यक्रमासाठी पानेगांवचे माजी उपसरपंच डॉ जयवंत गुडधे, प्राचार्य बी, वाय वाघ, राजेंद्र नवगिरे, सोपान जंगले, गोवर्धन माळी, प्रविण भामरे,गोपाळ पाटील,शितल पाटील कविता सपकाळ, जालिंदर जंगले,नामदेव पवार,विशाल भवार,पंकज आरंगळे, नामदेव शेलार,आदीनाथ जंगले, पत्रकार संघटनेचे जिल्हाप्रमुख बाळासाहेब पाटील, प्रदिप जंगले,तानाजी घोलप, अनिल चिंधे, आदींसह मोठ्या संख्येने मान्यवर सह शिक्षकवृंद उपस्थित होते.

प्रास्ताविक संजय पवार यांनी केले 

सुत्रसंचलन मुख्याध्यापक मंगेश पगारे 

आभार दत्तात्रय बर्डे यांनी मानले

श्री साईनाथ रुग्णालयात दुर्मिळ आणि आव्हानात्मक शस्त्रक्रियेला यश.

श्री साईनाथ रुग्णालयात दुर्मिळ आणि आव्हानात्मक शस्त्रक्रियेला यश.

शिर्डी, 

 श्री साईनाथ रुग्णालयात आज अत्यंत दुर्मिळ, जीवघेणी व वैद्यकीयदृष्ट्या आव्हानात्मक शस्त्रक्रिया यशस्वीरित्या पार पडली. शिर्डी येथील एका अल्पवयीन मुलाच्या गुदद्वारातून (मलविसर्जनाच्या जागेतून) टोपणविरहित बॉलपेन शरीरात घुसून आतड्यांना गंभीर दुखापत झाली होती. या गंभीर दुखापतीमुळे रुग्णाच्या जीवाला धोका निर्माण झाला होता.

रुग्णाची तातडीने तपासणी करून आवश्यक वैद्यकीय चाचण्या करण्यात आल्या. त्यानंतर वरिष्ठ जनरल सर्जन डॉ. श्रीराम नाईक यांनी अत्यंत कौशल्याने ही गुंतागुंतीची शस्त्रक्रिया केली. लेप्रोस्कोपी शस्त्रक्रियेदरम्यान शरीरात खोलवर अडकलेला बॉलपेन सुरक्षितपणे बाहेर काढून जखमी झालेल्या आतड्यांवरील उपचार करण्यात आले. शस्त्रक्रिया पूर्णपणे यशस्वी झाली असून रुग्णाची प्रकृती सध्या स्थिर आहे व वैद्यकीय देखरेखीखाली उपचार सुरु आहेत.

या शस्त्रक्रियेदरम्यान भूलतज्ज्ञ डॉ. महेंद्र तांबे. डॉ गोविंद कलाटे डॉ प्राजक्ता बनकर यांनी भूल व्यवस्थापनाची जबाबदारी यशस्वीपणे पार पाडली. तसेच सिस्टर अनिता कडूस, ब्रदर सुनील सदफळ, सुनील चव्हाण, रवींद्र मते, मच्छिंद्र देवकर, प्रमोद गायके, दिलीप डुंबरे, तुषार आधुडे व संपूर्ण ऑपरेशन थिएटर टीम, परिचारिका व इतर वैद्यकीय कर्मचाऱ्यांनी उत्कृष्ट समन्वय साधत शस्त्रक्रिया यशस्वी करण्यासाठी मोलाचे योगदान दिले.

या उल्लेखनीय यशाबद्दल श्री साईबाबा संस्थानचे मुख्य कार्यकारी अधिकारी गोरक्ष गाडीलकर यांनी डॉ. श्रीराम नाईक, डॉ. महेंद्र तांबे यांच्यासह संपूर्ण हॉस्पिटल व ऑपरेशन थिएटर टीमचे अभिनंदन केले. अत्यंत कठीण परिस्थितीत तातडीने निर्णय घेऊन यशस्वी उपचार करणाऱ्या वैद्यकीय पथकाचे त्यांनी विशेष कौतुक केले.

अत्याधुनिक वैद्यकीय सुविधा, अनुभवी डॉक्टर आणि समर्पित वैद्यकीय पथकाच्या बळावर श्री साईनाथ रुग्णालयात अशा जटिल शस्त्रक्रियाही यशस्वीरित्या पार पडत असून, गरजू रुग्णांना दर्जेदार आरोग्यसेवा देण्याची रुग्णालयाची बांधिलकी या घटनेतून पुन्हा अधोरेखित झाली आहे.

*पालकांसाठी महत्त्वाचे आवाहन*

लहान मुले खेळताना किंवा खाताना नाणी, शेंगदाणे, फुटाणे, प्लास्टिकचे छोटे तुकडे, बिया किंवा खेळण्यांचे छोटे भाग तोंडात टाकण्याची शक्यता असते. त्यामुळे त्यांच्या श्वासनलिकेत किंवा अन्ननलिकेत वस्तू अडकून श्वास गुदमरू शकतो. ही अत्यंत गंभीर व जीवघेणी वैद्यकीय आणीबाणी (Medical Emergency) असून अशा वेळी तातडीने वैद्यकीय उपचार घेणे आवश्यक आहे.

आजच्या सोशल मीडिया आणि रील्सच्या युगात अनेक लहान मुले मोबाईलवर पाहिलेल्या कृतींचे अनुकरण करण्याचा प्रयत्न करतात. त्यामुळे अपघात होण्याचा धोका वाढला आहे. त्यामुळे पालकांनी मुलांना मोबाईलचा वापर मर्यादित करून त्यांच्यावर सतत लक्ष ठेवावे, तसेच लहान वस्तू त्यांच्या आवाक्याबाहेर ठेवाव्यात, असे आवाहन डॉ. महेंद्र तांबे यांनी केले आहे.

आषाढी एकादशीनिमित्त श्री साईबाबा संस्थान येथे उत्साहपूर्ण वातावरणात स्‍थानिक उत्सव साजरा ....साईप्रसादालयात २३ हजार भाविकांनी घेतला साबुदाणा खिचडीच्या महाप्रसादाचा लाभ

आषाढी एकादशीनिमित्त श्री साईबाबा संस्थान येथे उत्साहपूर्ण वातावरणात स्‍थानिक उत्सव साजरा ....

साईप्रसादालयात २३ हजार भाविकांनी घेतला साबुदाणा खिचडीच्या महाप्रसादाचा लाभ

 

श्री साईबाबा संस्थान, शिर्डीच्या वतीने आज आषाढी एकादशी हा स्थानिक उत्सव मोठ्या भक्तिभावाने आणि उत्साहात साजरा करण्यात आला. या निमित्ताने श्री साईप्रसादालयात भाविकांसाठी साबुदाणा खिचडीच्या महाप्रसादाचे आयोजन करण्यात आले होते. तसेच श्री साईबाबा समाधी मंदिर व मंदिर परिसर आकर्षक फुलांच्या सजावटीने सुशोभित करण्यात आला होता.

आषाढ शुद्ध एकादशी हा दिवस श्री साईबाबांसाठी विशेष महत्त्वाचा मानला जातो. साईबाबांनी त्यांचे परमभक्त दासगणू महाराज यांना भगवान विठ्ठलाच्या रूपात दर्शन दिल्याची पावन परंपरा आहे. बाबांच्या काळात हा उत्सव द्वारकामाईत साजरा केला जात असे. त्याच परंपरेनुसार आजही हा उत्सव संस्थानतर्फे भक्तिभावाने साजरा करण्यात येतो. यानिमित्त श्री साईबाबांच्या समाधी चौथऱ्यावर भगवान श्री विठ्ठलाची प्रतिमा विराजमान करण्यात आली. तसेच धूप आरतीच्या वेळी श्री विठ्ठलाची पारंपरिक मराठी आरती गायली जाईल.

उत्सवानिमित्त विविध धार्मिक कार्यक्रमांचेही आयोजन करण्यात आले असून रात्री ०७.३० ते ०९.०० या वेळेत ह.भ.प. दिगंबर महाराज बोरसे, राहाता यांचे कीर्तन संपन्न होईल. त्यानंतर रात्री ९.१५ वाजता श्रींच्या पालखीची शिर्डी गावातून मिरवणूक काढण्यात येईल. पालखी समाधी मंदिरात परतल्यानंतर श्रींची शेजारती होईल.

आषाढी एकादशीच्या महाप्रसादाचा अंदाजे २३ हजार भाविकांनी लाभ घेतला. तसेच २८ हजार ९८३ भाविकांना अन्नपाकिटांचे वितरण करण्यात आले. या महाप्रसादाच्या तयारीसाठी संस्थानतर्फे ४५ पोते साबुदाणा, ३४ पोते शेंगदाणे, ७०० किलो शेंगदाणा तेल, सुमारे १,९०० किलो बटाटे तसेच इतर आवश्यक साहित्याचा वापर करण्यात आला.

आषाढी एकादशीच्या पावन पर्वानिमित्त श्री साईबाबा संस्थानने भाविकांसाठी उत्कृष्ट नियोजन करून धार्मिक वातावरणात उत्सव साजरा केला. हजारो साईभक्तांनी दर्शन, आरती, पालखी सोहळा आणि महाप्रसादाचा लाभ घेत भक्तिमय वातावरणाचा अनुभव घेतला.

नेवासा पोलिसांची धडाकेबाज कामगिरी मध्यरात्री शेतात लपवलेला लाखो रुपयांचा गांजा हस्तगत दोघे जेरबंद !

नेवासा पोलिसांची धडाकेबाज कामगिरी मध्यरात्री 

 शेतात लपवलेला लाखो रुपयांचा गांजा हस्तगत दोघे  जेरबंद !

नेवासा 

:-दि.२४ च्या मध्यरात्री नेवासा तालुक्यातील वाकडी परिसरात मध्यरात्रीच्या सुमारास पोलिसांनी मोठी कारवाई करत गांजा विक्रीच्या काळ्या धंद्याचा पर्दाफाश केला आहे.

स्वतःच्या फायद्यासाठी बेकायदेशीरपणे गांजा बाळगणाऱ्या व विक्रीच्या तयारीत असलेल्या दोन जणांना नेवासा पोलिसांनी रंगेहाथ पकडले असून, त्यांच्याकडून ४ लाख ७८ हजार ६० रुपयांचा तब्बल ४७.८२८ किलो गांजा जप्त करण्यात आला आहे. दि.२४ जुलैच्या रात्री ११:५० ते २५ जुलैच्या मध्यरात्री १:५० च्या सुमारास नेवासा पोलिसांना वाकडी शिवारात गुंगीकारक अंमली पदार्थांची विक्री होत असल्याची गुप्त माहिती नेवासा पोलीस स्टेशनचे प्रभारी अधिकारी प्रताप दराडे यांना माहिती मिळाली मिळताच शेवगाव उपविभागीय पोलीस अधिकारी निरज राजगुरू यांच्या उपस्थितीत नेवासा पोलिसांनी तात्काळ वाकडी येथील महादेव पंडित जवदे याच्या राहत्या घराजवळील शेतातील पत्र्याच्या शेडवर छापा टाकला.पोलिसांनी शेडची पाहणी केली असता तेथे पिवळ्या,पांढऱ्या आणि हिरव्या रंगाच्या ३ वेगवेगळ्या गोण्यांमध्ये गांजाचा साठा लपवून ठेवल्याचे उघडकीस आले.पिवळ्या गोणीत १५.८४२ किलो (किंमत १,५८,४२० रु.),

पांढऱ्या गोणीत १३.१०- किलो (किंमत १,३१,००० रु.) आणि हिरव्या गोणीत १८.८८६ किलो (किंमत १,८८,६४० रु.) असा एकूण ४७.८२८ किलो गांजा मिळून आला.या कारवाईत पोलिसांनी महादेव पंडित जवदे (वय ३८ वर्षे) आणि त्याचा साथीदार शुभम बाबासाहेब काळे (वय २९ वर्षे, दोघे रा.वाकडी,ता. नेवासा,जि.अहिल्यानगर) यांना  ताब्यात घेतले. आरोपी स्वतःच्या फायद्यासाठी विनापरवाना बेकायदेशीरपणे गांजाची साठवणूक व विक्री करत असल्याचे स्पष्ट झाले आहे.या प्रकरणी पोलीस अंमलदार शहाजी बाबासाहेब आंधळे यांच्या फिर्यादीवरून नेवासा पोलीस ठाण्यात गुरनं ६३४/२०२६, NDPS कलम २०,२२ प्रमाणे गुन्हा दाखल करण्यात आला आहे.

ही कारवाई अहिल्यानगर पोलीस अधीक्षक मुम्मका सुदर्शन, अतिरिक्त पोलीस अधीक्षक सोमनाथ वाघचौरे,

शेवगांव उपविभागीय पोलीस उपअधीक्षक निरज राजगुरू,पोलीस निरीक्षक  प्रताप दराडे ,सहाय्यक पोलीस निरीक्षक  अमोल पवार पोलीस उपनिरीक्षक मनोज अहिरे ,पोलीस हवालदार शहाजी आंधळे ,रवी शेळके ,अजय साठे, पोलीस कॉन्स्टेबल अमोल डमाळे, हरी गायतडक ,संदीप ढाकणे, सुमित करंजकर,नवनाथ शेकडे, गणेश फाटक, राहुल गायकवाड, चालक पोलीस हवालदार खंडागळे मेजर, महिला पोलीस कॉन्स्टेबल वर्षा कांबळे व होमगार्ड यांनी केली. 

पुढील तपास पोलीस अधीक्षक मुम्मका सुदर्शन यांच्या सूचनेनुसार पो.नि.प्रताप दराडे करत आहेत.

वारकऱ्यांचे आशीर्वाद हीच आमची संपत्ती; आषाढी वारीत विखे पाटील परिवाराची सेवाभावाची परंपरा कायम : डॉ. सुजय विखे पाटील

वारकऱ्यांचे आशीर्वाद हीच आमची संपत्ती; आषाढी वारीत विखे पाटील परिवाराची सेवाभावाची परंपरा कायम : डॉ. सुजय विखे पाटील

जनसेवा फाउंडेशनच्या माध्यमातून १५ हजारांहून अधिक रेनकोट व शबनम बॅगचे वाटप; हजारो वारकऱ्यांसाठी भव्य मुक्काम व सर्व सुविधा उपलब्ध

पंढरपूर 

वारकरी बांधवांचे प्रेम आणि आशीर्वाद हीच आमची खरी संपत्ती आहे. व समाजसेवा आणि वारकरी सेवेला विखे पाटील परिवाराने नेहमीच प्राधान्य दिले असून, आषाढी वारीच्या निमित्ताने ही सेवाभावाची परंपरा अधिक सक्षमपणे पुढे सुरू ठेवण्याचा आमचा प्रयत्न आहे, असे प्रतिपादन भाजपा प्रदेश उपाध्यक्ष डॉ. सुजय विखे पाटील यांनी केले. आषाढी एकादशीच्या पावन पर्वानिमित्त श्री विठ्ठल-रुक्मिणी मातेचे दर्शन घेऊन त्यांनी राज्यातील जनतेच्या सुख, समृद्धी आणि आरोग्यासाठी प्रार्थना केली.

यानिमित्ताने डॉ. सुजय विखे पाटील यांनी पद्मश्री डॉ. विठ्ठलराव विखे पाटील स्मृती मंडळाच्या भक्तनिवास मठात मुक्कामी असलेल्या वारकरी दिंड्यांना भेट देत वारकरी बांधवांशी मनमोकळा संवाद साधला. त्यांच्या अडीअडचणी जाणून घेत आषाढी एकादशीच्या शुभेच्छा देत विठ्ठलभक्तांच्या सेवेसाठी विखे पाटील परिवार कायम कटिबद्ध असल्याचा विश्वास व्यक्त केला.

आषाढी वारीदरम्यान अहिल्यानगर, नाशिक तसेच राज्यातील विविध भागांतून पायी पंढरपूरला येणाऱ्या वारकरी बांधवांसाठी पद्मश्री डॉ. विठ्ठलराव विखे पाटील स्मृती मंडळाच्या सुमारे सात हजार चौरस फूट क्षेत्रफळाच्या भव्य मंडप व भक्तनिवास मठात मुक्कामाची उत्कृष्ट व्यवस्था करण्यात आली आहे. जनसेवा फाउंडेशनच्या माध्यमातून निवास, भोजन, स्वच्छ पिण्याचे पाणी, स्वच्छतागृहे, वैद्यकीय मदत तसेच इतर आवश्यक सुविधा अत्यंत नियोजनबद्ध पद्धतीने उपलब्ध करून दिल्या जात आहेत.

सध्या चाळीसहून अधिक वारकरी दिंड्या या भक्तनिवासात मुक्कामी असून हजारो वारकरी या सेवांचा लाभ घेत आहेत. पंढरपूरमधील सर्वात मोठ्या आणि सुसज्ज वारकरी सेवा मंडपांपैकी हा एक मंडप असून, वारकऱ्यांना कोणत्याही प्रकारची गैरसोय होऊ नये यासाठी स्वयंसेवक चोवीस तास सेवेत तत्पर आहेत.

यावेळी जलसंपदा मंत्री तथा पालकमंत्री राधाकृष्ण विखे पाटील यांच्या मार्गदर्शनाखाली जनसेवा फाउंडेशनच्या वतीने वारकरी बांधवांना १५ हजारांहून अधिक रेनकोट आणि शबनम बॅगचे वितरण करण्यात आले. डॉ. सुजय विखे पाटील यांच्या हस्ते या साहित्याचे वाटप करण्यात आले.

यावेळी बोलताना डॉ. सुजय विखे पाटील म्हणाले, वीस ते पंचवीस दिवसांचा पायी प्रवास करून वारकरी पंढरपूरमध्ये दाखल होतात. त्यांच्या मुक्कामाची, सुरक्षिततेची आणि सर्व सोयी-सुविधांची उत्तम व्यवस्था व्हावी, यासाठी विखे पाटील परिवार आणि जनसेवा फाउंडेशन सातत्याने कार्यरत असते.  ही सेवा अखंड ४० वर्षा पासून अविरत सुरू आहे . तसेच वारकऱ्यांच्या सेवेत कोणतीही उणीव राहू नये, हीच आमची भूमिका असून त्यांच्या चेहऱ्यावरील समाधान आणि आशीर्वाद हीच आमची खरी संपत्ती आहे.

भक्तनिवासातील सर्व दिंड्यांना भेट देऊन डॉ. सुजय विखे पाटील यांनी वारकरी बांधवांची विचारपूस केली. विखे पाटील परिवाराच्या वतीने सर्व वारकरी भक्तांना आषाढी एकादशीच्या शुभेच्छा देत श्री विठ्ठल-रुक्मिणीच्या कृपेने सर्वांच्या जीवनात सुख, शांती, समृद्धी आणि समाधान नांदो, अशी प्रार्थना त्यांनी केली

शिर्डी लोकसभा मतदारसंघातील खासदार श्री भाऊसाहेब वाकचौरे यांनी पाठविलेल्या २४ विकासकामांसाठीच्या प्रस्तावाला ०४ कोटी ३८ लाख रुपयांच्या निधीस राज्य शासनाची मंजूरी.

शिर्डी लोकसभा मतदारसंघातील खासदार श्री भाऊसाहेब वाकचौरे यांनी पाठविलेल्या  २४ विकासकामांसाठीच्या प्रस्तावाला  ०४ कोटी ३८ लाख रुपयांच्या  निधीस राज्य शासनाची  मंजूरी. 

 खासदार भाऊसाहेब वाकचौरे यांच्या सातत्यपूर्ण पाठपुराव्याला यश. 

    शिर्डी, 

:मुख्यमंत्री देवेंद्र फडणवीस, उपमुख्यमंत्री एकनाथ शिंदे व सुनेत्रा अजित पवार यांच्या निर्देशानुसार सामाजिक न्याय मंत्री संजय शिरसाठ यांनी भारतरत्न डॉ. बाबासाहेब आंबेडकर सामाजिक विकास योजनेंतर्गत शिर्डी लोकसभा मतदारसंघातील २४ विविध विकासकामांसाठी ४ कोटी ३८ लाख रुपयांचा निधी मंजूर केला आहे. लोकसभा सदस्य भाऊसाहेब वाकचौरे यांच्या सातत्यपूर्ण पाठपुराव्यामुळे सन २०२६-२७ या आर्थिक वर्षासाठी या कामांना मंजुरी मिळाली असून, त्यापैकी ३० टक्के प्रमाणे १ कोटी ३० लाख ८० हजार रुपयांचा निधी वितरित करण्यास शासनाने मान्यता दिली आहे.

सामाजिक न्याय व विशेष सहाय्य विभागाच्या दि. २३ जुलै २०२६ रोजीच्या शासन निर्णय क्रमांक साजियो-२०२६/प्र.क्र.९२५(१)/अजाक अन्वये २ कोटी ३८ लाख रुपयांच्या १५ विकासकामांना मंजुरी देण्यात आली आहे. यामध्ये अकोले येथील डॉ. बाबासाहेब आंबेडकर पदस्पर्श भवन विस्तारीकरण, कोपरगाव तालुक्यातील धामोरी व श्रीरामपूर तालुक्यातील खंडाळा येथे संविधान भवन बांधकाम या प्रत्येकी ३० लाख रुपयांच्या कामांचा समावेश आहे. तसेच श्रीरामपूर तालुक्यातील हरेगाव येथे डॉ. बाबासाहेब आंबेडकर स्मारक परिसरात सांस्कृतिक भवन बांधकामासाठी २० लाख रुपये मंजूर करण्यात आले आहेत. काकडी येथील डॉ. बाबासाहेब आंबेडकर स्मारक सुशोभीकरण, करंजी येथील संत रविदास महाराज मंदिर सभामंडप, संगमनेर तालुक्यातील घुलेवाडी येथील लोकशाहीर अण्णाभाऊ साठे गृहनिर्माण संस्था प्रांगणातील सभामंडप, खंदरमाळी गावठाण अंतर्गत संत रोहिदास महाराज मंदिरासमोरील सभामंडप, आश्वी येथील डॉ. बाबासाहेब आंबेडकर सामाजिक सभागृहास संरक्षक भिंत व सुशोभीकरण, श्रीरामपूर तालुक्यातील निमगाव खैरी येथील संत रोहिदास महाराज मंदिर सभामंडप तसेच जळके खुर्द येथील आंबेडकर नगर दलित वस्ती सभामंडप या कामांसाठी प्रत्येकी १५ लाख रुपये मंजूर करण्यात आले आहेत. राहुरी तालुक्यातील करजगाव येथील दलित वस्ती स्मशानभूमी सुशोभीकरणासाठी १० लाख रुपये, तर करजगाव येथील डॉ. बाबासाहेब आंबेडकर स्मारक परिसरात पेव्हर ब्लॉक बसविणे आणि श्रीरामपूर तालुक्यातील खोकर येथील मातंग समाज अमरधाम येथे पेव्हर ब्लॉक बसविण्यासाठी प्रत्येकी ५ लाख रुपये मंजूर करण्यात आले आहेत. तसेच श्रीरामपूर येथील डॉ. बाबासाहेब आंबेडकर स्मारक परिसरात पिण्याच्या पाण्याची सुविधा उपलब्ध करून देण्यासाठी ३ लाख रुपयांचा निधी मंजूर करण्यात आला आहे. याचप्रमाणे, सामाजिक न्याय व विशेष सहाय्य विभागाच्या दि. २३ जुलै २०२६ रोजीच्या शासन निर्णय क्रमांक साजियो-२०२६/प्र.क्र.९२५/अजाक अन्वये २ कोटी रुपयांच्या ९ विकासकामांना प्रशासकीय मान्यता देण्यात आली आहे. यामध्ये अकोले नगरपंचायत, संगमनेर नगरपरिषद, कोपरगाव नगरपरिषद, श्रीरामपूर नगरपरिषद, देवळाली नगरपरिषद, नेवासा नगरपंचायत व राहता नगरपरिषद हद्दीत संत रोहिदास भवन उभारण्यासाठी प्रत्येकी २५ लाख रुपये मंजूर करण्यात आले आहेत. तसेच कोपरगाव तालुक्यातील कोळगावथडी येथील दलित वस्तीत समाजमंदिर बांधण्यासाठी १५ लाख रुपये, तर जेऊर कुंभारी येथील डॉ. बाबासाहेब आंबेडकर स्मारक परिसरात संरक्षक भिंत व सुशोभीकरणासाठी १० लाख रुपयांचा निधी मंजूर करण्यात आला आहे,अशी माहिती खासदार वाकचौरे यांनी यावेळी दिली तसेच यावेळी खासदार वाकचौरे यांनी राज्याचे लोकप्रिय उपमुख्यमंत्री मा.ना.श्री.एकनाथ जी शिंदे साहेब व राज्याचे सामाजिक न्याय मंत्री मा.ना.श्री.संजय शिरसाठ साहेब यांचे विशेषत्वाने आभार मानले. Dr

शिर्डी लोकसभा मतदारसंघाच्या विकासासाठी केंद्र सरकार भरीव मदत करणार - खा.भाऊसाहेब वाकचौरे

शिर्डी लोकसभा मतदारसंघाच्या विकासासाठी केंद्र सरकार भरीव मदत करणार - खा.भाऊसाहेब वाकचौरे 

नुकतेच केंद्रीय गृहमंत्री मा. ना.अमित भाई शाह यांची सदिच्छा भेट घेऊन शिर्डी लोकसभा मतदारसंघाच्या सर्वांगीण, शाश्वत आणि नियोजित विकासासाठी ४७ केंद्रीय मंत्रालयांशी संबंधित विविध विकास प्रस्तावांचे एकत्रित निवेदन सादर केले असल्याची माहिती शिर्डी लोकसभेचे खासदार भाऊसाहेब वाकचौरे यांनी दिली. यापुढे शिर्डी लोकसभा विकासासाठी केंद्र सरकारकडून भरीव मदत करण्याचे आश्वासन ना.शहा यांनी दिले असल्याने विकासाचा वेग दुप्पट होणार असल्याची खात्री खा.वाकचौरे यांनी दिली.

या निवेदनामध्ये शिर्डी अंतर्गत विमानतळाचा विस्तार, रेल्वे प्रकल्प, राष्ट्रीय महामार्ग, पिण्याचे पाणी, आरोग्य, शिक्षण, पर्यटन, औद्योगिक विकास, रोजगार, आदिवासी विकास, स्मार्ट सिटी, आदर्श गाव, युवा रोजगार, कृषी व्यवसाय, CSR उपक्रम तसेच लोकसभा क्षेत्रातील धार्मिक आणि सांस्कृतिक विकास अशा अनेक महत्त्वपूर्ण विषयांचा समावेश आहे. यापुढे केंद्र आणि राज्य सरकार यांच्या साथीने शिर्डी मतदार संघातील प्रत्येक तालुक्यात विकासाची ब्लु प्रिंट तयार करणार असून आमच्या जनहित ऍप‘वर जनतेकडून अपेक्षित कामांचे अभिप्राय मागवत आहोत. निवडणूक जिंकण्यासाठी नव्हे तर जनतेप्रति समर्पित होऊन माझ्या खासदारकीचे प्रत्येक पाऊल हे सर्वसामान्य जनतेला अभिप्रेत असणाऱ्या कामातून पुढे टाकणार असल्याचे खा.वाकचौरे यांनी ठामपणे सांगितले.

मा.ना.अमित भाई शहा यांना शिर्डी भेटीचे आणि श्री साई दर्शनाचे निमंत्रण दिले असून शिर्डीबद्दल त्यांनी गौरोदगार काढले आणि महाराष्ट्रात शेतीविषयक धोरणाबाबत संपूर्ण माहिती घेतली. केंद्रीय सहकार क्षेत्रात मा.ना.शहा साहेबांनी महत्वकांक्षी बदल केल्याने महाराष्ट्राच्या वतीने त्यांचे जाहीर आभार व्यक्त केले. शिर्डी लोकसभा मतदारसंघाच्या विकासासाठी सातत्याने पाठपुरावा करून जनतेच्या अपेक्षा पूर्ण करण्यासाठी मी कटिबद्ध असल्याचे शेवटी खा.वाकचौरे यांनी स्पष्ट केले.

लोकशाही, संविधान व विद्यार्थ्यांच्या न्याय्य हक्कांच्या समर्थनार्थ उद्या राहाता तालुका एकवटणार

लोकशाही, संविधान व विद्यार्थ्यांच्या न्याय्य हक्कांच्या समर्थनार्थ उद्या राहाता तालुका एकवटणार

राहाता, 

 : दिल्ली येथील जंतर-मंतर येथे विद्यार्थी आंदोलनादरम्यान विद्यार्थ्यांवर झालेल्या लाठीचार्ज व पोलिस कारवाईच्या निषेधार्थ तसेच लोकशाही, संविधान आणि विद्यार्थ्यांच्या न्याय्य हक्कांच्या समर्थनार्थ शनिवार, दि. २५ जुलै २०२६ रोजी सकाळी १०.०० वाजता वीरभद्र मंदिर प्रांगण, राहाता येथे निषेध सभेचे आयोजन करण्यात आले आहे.

या निषेध सभेत राहाता तालुक्यातील विद्यार्थी, पालक, युवक, शेतकरी, व्यापारी, महिला, विविध सामाजिक संघटनांचे प्रतिनिधी, राजकीय पक्षांचे पदाधिकारी व कार्यकर्ते तसेच लोकशाही आणि संविधानिक मूल्यांवर विश्वास ठेवणाऱ्या सर्व नागरिकांनी मोठ्या संख्येने सहभागी व्हावे, असे आवाहन करण्यात आले आहे.

सभेमध्ये लोकशाही मूल्ये, संविधान, अभिव्यक्ती स्वातंत्र्य, विद्यार्थ्यांच्या न्याय्य हक्कांबाबत भूमिका मांडण्यात येणार असून, जंतर-मंतर येथील विद्यार्थी आंदोलनाच्या पार्श्वभूमीवर घडलेल्या घटनांची माहिती उपस्थितांना देण्यात येणार आहे. तसेच लोकशाही मार्गाने निषेध नोंदवून विद्यार्थ्यांच्या न्याय्य हक्कांना पाठिंबा व्यक्त करण्यात येणार आहे.

राहाता तालुक्यातील विद्यार्थी, पालक, विविध सामाजिक संघटना व राजकीय पक्ष यांच्या वतीने तालुक्यातील सर्व नागरिकांनी या निषेध सभेस मोठ्या संख्येने उपस्थित राहून लोकशाही, संविधान आणि विद्यार्थ्यांच्या न्याय्य हक्कांच्या समर्थनार्थ आपला सहभाग नोंदवावा, असे आवाहन करण्यात आले आहे.

स्वामी शिवानंदगिरीजी महाराज यांचे हस्ते डेबूजी प्रतिष्ठाण यांच्या वधुवर परिचय मेळावा पत्रिकेचे प्रकाशन संपन्न.:

स्वामी शिवानंदगिरीजी महाराज यांचे हस्ते डेबूजी प्रतिष्ठाण यांच्या वधुवर परिचय मेळावा पत्रिकेचे प्रकाशन संपन्न.:

                  डेबूजी प्रतिष्ठाण महाराष्ट्र राज्य व रेशीमगाठी वधुवर मंडळ पुणे यांचे संयुक्त विद्यमाने राष्ट्रसंत गाडगेबाबा यांच्या 150 व्या जयंतीचे औचित्य साधून नोव्हेंबर महिन्यात शिर्डी येथे परीट / धोबी समाजाचा वधुवर परिचय मेळावा आयोजित करण्यात येणार आहे. या परिचय मेळाव्यात उच्चशिक्षित असलेले, नसलेले, लॉन्ड्रीधारक, शेतकरी, इतर व्यावसायिक, विधवा, विधुर, घटस्फोटीत या सर्वांना प्रवेश असणार आहे. साईबाबांच्या पावनभूमीत हा वधुवर परिचय मेळावा असल्याने साईबाबांच्या आशीर्वाद निश्चित वधूवरांना मिळतील. 

                   डेबूजी प्रतिष्ठाणच्या वतीने नुकतेच या मेळाव्याचे जाहिरातीचे पत्रक तयार करण्यात आले असून मंजूर येथील सिद्धेश्वर देवस्थानचे महंत श्री श्री 1008 परीब्रजीकाचार्य, महाराष्ट्र पिठाधीशश्वर, अनंत विभूषित, दत्तात्रयरत्न महामंडलेश्वर, प. पु. स्वामी शिवानंदगिरिजी महाराज यांच्या हस्ते त्या पत्रकाचे प्रकाशन करून आयोजकांनी महाराजांचे आशीर्वाद घेतले. महाराजांनी या सामाजिक उपक्रमास भरभरून शुभाशीर्वाद दिले. 

                  या वधुवर परिचय मेळाव्यात सहभागी होण्यासाठी वधुवर  रजिस्ट्रेशन फी ही 500 रुपये असून पालकांची उपस्थिती फी ही  100 रुपये असेल.  रजिस्ट्रेशन व पालक फी ही श्री. सुधाकर वाघ यांच्या 9860075459 या गुगल पे नंबरवर पाठवावी. व बायोडाटा, फोटो आणि फी भरल्याचा स्क्रीनशॉट श्री. राजेंद्र फंड यांच्या 9881085671 या मोबाईल नंबरवर पाठवावा. या वधुवर मेळाव्यासाठी वधुवर व सोबत पालक यांची उपस्थिती आवश्यकच आहे.  वधुवर यांना आठवडाभर अगोदर सर्व बायोडाटा कॉम्प्युटर प्रिंट डेबूजी प्रतिष्ठाणच्या ग्रूपवर पहावयास मिळेल. म्हणजे चॉइस करणे सोपे होईल. वधुवर मेळाव्याचे ठिकाणी वधू आणि वर व त्यांचे पालकांना चर्चा करण्यासाठी स्वतंत्र व्यवस्था करण्यात आली आहे. असाच उपक्रम आमचे सहआयोजक रेशीमगाठी वधुवर मंडळ पुणे यांनी मागील वर्षी राबविल्याने आतापर्यंत 30 विवाह जुळले गेले आहेत. 

                डेबूजी प्रतिष्ठाण व रेशीमगाठी वधुवर मंडळ पुणे यांचे समन्वयाने शिर्डी येथे आयोजित करण्यात येत असलेल्या वधुवर परिचय मेळाव्याचे रजिस्ट्रेशन सुरू होताच महाराष्ट्रभरातून परीट / धोबी समाजातील पालकांनी आपल्या पाल्याचे रजिस्ट्रेशनसाठी नावनोंदणी मोठ्या प्रमाणात सुरू केली आहे. 

                जास्तीत जास्त वधुवर यांनी या वधुवर  परिचय मेळाव्यात सहभागी व्हावे असे आवाहन आयोजक संस्थापक श्री. राजेंद्र फंड, 

अध्यक्ष श्री. सुनील निकम, उपाध्यक्ष श्री. माधवराव देसाई,खजिनदार श्री. सुधाकर वाघ,  आयोजक श्री.  अनिल हुपरीकर अध्यक्ष रेशीमगाठी वधुवर मंडळ पुणे, मार्गदर्शक श्री. दिगंबर हौसारे सो. जिल्हा उपनिबंधक सहकार संस्था पुणे, सहसचिव श्री. अनिल देसाई , सहखजिनदार श्री. विलासराव रोकडे, श्री. किशोरजी गवळी उपकार्यकारी अभियंता, साईबाबा संस्थान शिर्डी,डॉ. गणेश वाघ, श्री. सोपानराव भागवत, श्री. योगेश रोकडे, श्री. साईनाथ हजारे, श्री महेश यादव, श्री. कृष्णा शिंदे, श्री. पंकज राऊत,  श्री. शरद राऊत, सौ. सुषमा अमृतकर, सौ. सुनीता राक्षे, सौ. शिल्पा दळवी, कायदेविषयक सल्लागार ॲड. अमोल गवळी हायकोर्ट संभाजीनगर, कायदेविषयक सल्लागार श्री. विजय क्षीरसागर, प्रसिद्धी प्रमुख पत्रकार श्री. महादेव दळे, पत्रकार राजेंद्र देसाई, पत्रकार श्री. योगेश सगर यांनी केले आहे.

राहता तहसील कार्यालय येथे 23 7 2026 रोजी आमरण उपोषण

राहाता 

राहाता तालुक्यातील एकरुखे येथील मी ज्ञानेश्वर लक्ष्मण  जोरे रहिवाशी असून दि 23/07/2026 रोजी वार गुरुवार या दिवशी, उपोषण बाबत सर्व वरिष्ठांना  दोन अर्ज पाठवलेले असून तसेच तहसील कार्यालय यांना दोन अर्ज दिलेले आहे माझे म्हणणे आहे की सरकारी जागेवरील अतिक्रमण चर क्रमांक दोन वरील अतिक्रमण काढून चर  लगत तेथे शेत शिवार रस्ता असल्याने तो खुला करण्यात यावा अशी माझी मागणी आहे तसेच  चर क्रमांक 2  मध्ये नैसर्गिक प्रवाह पावसाचे पाणी येण्यासाठी दक्षिण उत्तर ओढा आहे तो खुला करण्यात यावा अशी मागणी आहे यासाठी मी ज्ञानेश्वर लक्ष्मण जोरे व माझी पत्नी आम्ही दोघे तहसील कार्यालय येथे दिनांक 23/7/2026 रोजी वार गुरुवार या दिवशी आमरण उपोषणास बसणार आहे

माननीय नामदार श्री राम शिंदे विधानपरिषद अध्यक्ष यांनी श्री साईबाबांच्या समाधीचे दर्शन घेतले

मा. ना. श्री. राम शिंदे, विधानपरिषद अध्‍यक्ष, महाराष्‍ट्र राज्‍य यांनी श्री साईबाबांच्‍या समाधीचे दर्शन घेतले. दर्शनानंतर श्री साईबाबा संस्‍थानच्‍या वतीने मा. उप कार्यकारी अधिकारी श्री भिमराज दराडे यांनी त्यांचा सत्‍कार केला.

प्रवरानगर येथे २२ जुलै रोजी महाराजस्व समाधान शिबिराचे आयोजन मंत्री विखे पाटील यांच्या उपस्थितीत विविध योजनांचे वितरण

प्रवरानगर येथे २२ जुलै रोजी महाराजस्व समाधान शिबिराचे आयोजन

मंत्री विखे पाटील यांच्या उपस्थितीत विविध योजनांचे वितरण 

शिर्डी, 

 राज्य शासनाच्या महसूल व वन विभागातर्फे ‘छत्रपती शिवाजी महाराज महाराजस्व समाधान शिबिर अभियान’ अंतर्गत २२ जुलै रोजी सकाळी १० वाजता प्रवरानगर येथील धनंजयराव गाडगीळ सभागृहात विशेष शिबिराचे आयोजन करण्यात आले असून, या शिबिरात केंद्र व राज्य शासनाच्या विविध योजनांचे लाभ एकाच ठिकाणी उपलब्ध करून दिले जाणार आहेत. शिबिरात राज्याचे जलसंपदामंत्री तथा जिल्ह्याचे पालकमंत्री डॉ. राधाकृष्ण विखे पाटील यांच्या हस्ते विविध लाभांचे वितरण करण्यात येणार आहे, अशी माहिती शिर्डी उपविभागीय अधिकारी माणिक आहेर यांनी दिली.

मुख्यमंत्री देवेंद्र फडणवीस यांच्या वाढदिवसानिमित्त व माजी उपमुख्यमंत्री दिवंगत अजितदादा पवार यांच्या जयंतीचे औचित्य साधून महसूल विभागाने २२ जुलै ते २ ऑगस्ट या कालावधीत राज्यातील सर्व विधानसभा मतदारसंघांत ‘छत्रपती शिवाजी महाराज महाराजस्व समाधान शिबिर अभियान’ राबविण्याचा निर्णय घेतला आहे. प्रत्येक विधानसभा मतदारसंघात या कालावधीत एका दिवशी शिबिर आयोजित करण्यास शासनाने मान्यता दिली आहे.

शिर्डी विधानसभा मतदारसंघातील लाभार्थ्यांना विविध योजनांच्या लाभांचे वितरण या शिबिरातून करण्यात येणार आहे.या कार्यक्रमास खा.भाऊसाहेब वाकचौरे माजी मंत्री आण्णासाहेब म्हस्के पाटील

जिल्हा परिषदेच्या माजी अध्यक्षा सौ शालिनी विखे पाटील भाजपाचे प्रदेश उपाध्यक्ष डॉ सुजय विखे यांच्यासह  जिल्हाधिकारी डॉ. पंकज आशिया, जिल्हा परिषदेचे मुख्य कार्यकारी अधिकारी आनंद भंडारी शिर्डीचे अपर जिल्हाधिकारी बाळासाहेब कोळेकर यांच्यासह सर्व विभागाचे अधिकारी उपस्थित राहणार आहेत.

महसूल विभाग अधिक लोकाभिमुख, पारदर्शक व गतिमान करण्याच्या उद्देशाने हा उपक्रम राबविण्यात येत आहे. शासनाच्या विविध योजनांचा लाभ तळागाळातील शेवटच्या नागरिकापर्यंत प्रभावीपणे पोहोचावा, हा या अभियानामागील प्रमुख उद्देश आहे.

प्रवरानगर येथील डॉ. धनंजयराव गाडगीळ सभागृहात होणाऱ्या या शिबिरासाठी प्रशासकीय स्तरावरील सर्व तयारी पूर्ण झाली असून, महसूल,कृषी,आरोग्य,

कौशल्य विकास,महीला बचत  गटांना  विविध योजनांच्या पात्र लाभार्थीना प्रमाणपत्र साहीत्याचे वितरण करण्यात येणार आहे.

जनतेच्या प्रत्येक प्रश्नाला न्याय देण्याची ग्वाही; राहता येथे डॉ. सुजय विखे पाटील यांचा जनता दरबार संपन्न

जनतेच्या प्रत्येक प्रश्नाला न्याय देण्याची ग्वाही; राहता येथे डॉ. सुजय विखे पाटील यांचा जनता दरबार संपन्न

राहता 

जनतेच्या समस्या थेट ऐकून त्यांचे तातडीने निराकरण करण्याच्या उद्देशाने राहता नगरपालिकेच्या सभागृहात भाजपा प्रदेश उपाध्यक्ष डॉ. सुजय विखे पाटील यांच्या प्रमुख उपस्थितीत जनता दरबाराचे आयोजन करण्यात आले. यावेळी राहतातालुक्यातील व शहरातील नागरिकांनी विविध नागरी सुविधा, विकासकामे तसेच वैयक्तिक व सार्वजनिक स्वरूपाच्या अडीअडचणी निवेदनाद्वारे डॉ. सुजय विखे पाटील यांच्यासमोर मांडल्या.

जनता दरबारात प्रत्येक नागरिकाची समस्या संयमाने ऐकत डॉ. सुजय विखे पाटील यांनी संबंधित विभागांच्या अधिकाऱ्यांशी प्रत्यक्ष चर्चा केली. तातडीने मार्गी लावता येणाऱ्या प्रश्नांवर तत्काळ कार्यवाही करण्याचे निर्देश देतानाच उर्वरित प्रश्नही प्राधान्याने सोडविण्याच्या सूचना त्यांनी अधिकाऱ्यांना दिल्या. जनतेच्या प्रत्येक प्रश्नाला न्याय मिळवून देण्यासाठी आपण कायम प्रयत्नशील राहू, अशी ग्वाही त्यांनी यावेळी उपस्थित नागरिकांना दिली.

याप्रसंगी राहता नगरपरिषदेचे  उपनगराध्यक्ष, सर्व नगरसेवक, मुख्याधिकारी लोंढे, विविध विभागांचे अधिकारी तसेच भाजपा पदाधिकारी मोठ्या संख्येने उपस्थित होते.

जनता दरबारात पाणीपुरवठा, रस्ते, स्वच्छता, वीज, नागरी सुविधा, शासकीय योजनांचा लाभ तसेच स्थानिक विकासाशी संबंधित विविध प्रश्न नागरिकांनी मांडले. प्रत्येक निवेदनाची गांभीर्याने दखल घेत संबंधित अधिकाऱ्यांना वेळेत कार्यवाही करून नागरिकांना दिलासा देण्याच्या सूचना डॉ. सुजय विखे पाटील यांनी दिल्या.

नागरिकांशी थेट संवाद साधत त्यांच्या अडीअडचणी जाणून घेण्याचा हा उपक्रम प्रशासन आणि जनतेतील समन्वय अधिक बळकट करणारा ठरल्याची भावना उपस्थित नागरिकांनी व्यक्त केली.

सेवा हीच खरी साधना... माणुसकी हाच खरा धर्म ॥

॥ सेवा हीच खरी साधना... माणुसकी हाच खरा धर्म ॥

मनोमय हिलिंग हार्ट फाउंडेशन, राहाता यांच्या "सेतू संगम" या समाजहिताच्या उपक्रमांतर्गत श्री नवनाथ महाराज भव्य पायी दिंडी सोहळा, कोऱ्याळे येथे पायी वारी करणाऱ्या वारकऱ्यांसाठी ४०० रेनकोट उपलब्ध करून देण्यात आले.

आषाढी वारी म्हणजे केवळ पायी चालण्याचा प्रवास नसून, तो श्रद्धा, समर्पण, संयम, त्याग आणि सेवाभावाचा जीवनाला दिशा देणारा महोत्सव आहे. हजारो वारकरी विठ्ठलनामाचा अखंड गजर करत ऊन, वारा, पाऊस यांची पर्वा न करता आपल्या आराध्य दैवताच्या भेटीसाठी निघतात. अशा या भक्तीमय प्रवासात पावसामुळे अनेक वारकऱ्यांना अडचणींचा सामना करावा लागतो. या गरजेची जाणीव ठेवून मनोमय हिलिंग हार्ट फाउंडेशनने आपल्या सामाजिक बांधिलकीतून आणि संस्थेच्या निधीतून ४०० रेनकोट उपलब्ध करून देत या सेवाकार्यात मोलाचे योगदान दिले.

हा उपक्रम ह.भ.प. गायकवाड महाराज, कोऱ्याळे तसेच मा. नगरसेवक प्रवीण (गोटूभाऊ) बोरकर व मित्रमंडळ यांच्या मार्गदर्शनाखाली यशस्वीरीत्या पार पडला. समाजातील विविध घटकांनी एकत्र येत वारकऱ्यांच्या सेवेसाठी उचललेले हे पाऊल म्हणजे समाजातील ऐक्य, संवेदनशीलता आणि माणुसकीचे जिवंत उदाहरण आहे.

मनोमय हिलिंग हार्ट फाउंडेशन ही केवळ एक सामाजिक संस्था नसून, "गरजूंना आधार, समाजाला दिशा आणि सेवेला संस्कार" हे ध्येय बाळगून कार्य करणारे एक कुटुंब आहे. समाजातील प्रत्येक गरजू व्यक्तीपर्यंत मदतीचा हात पोहोचवणे, आरोग्य, शिक्षण, सामाजिक उपक्रम आणि मानवतेची जपणूक करणे हीच संस्थेची खरी ओळख आहे.

या सेवाभावी कार्यासाठी संस्थापक डॉ. येलम यांच्या प्रेरणेतून संस्थेने सामाजिक उत्तरदायित्व स्वीकारत हा उपक्रम साकारला. या कार्यामागे संस्थेचे सदस्य किरण वाणी, पल्लवी नरारे, सिद्धी गाडेकर, पृथ्वीराज दिवटे, जनार्दन गाढवे, डॉ. संकेत येलम, धनंजय सोनवणे तसेच मनोमय हिलिंग हार्ट फाउंडेशनच्या सर्व सदस्यांचे सहकार्य आणि पाठबळ लाभले.

आजच्या धावपळीच्या आणि स्वकेंद्रित जीवनशैलीत समाजासाठी निःस्वार्थपणे कार्य करणाऱ्या हातांची गरज अधिक आहे. दुसऱ्यांच्या चेहऱ्यावर आनंद फुलवणे, संकटात साथ देणे आणि गरजूंना आधार देणे यापेक्षा मोठे पुण्य दुसरे नाही. सेवा ही केवळ दान नसते, तर ती समाजाशी असलेली आपली नैतिक जबाबदारी असते. अशा प्रत्येक छोट्या कृतीतून मोठा सामाजिक बदल घडू शकतो.

मनोमय हिलिंग हार्ट फाउंडेशनचा विश्वास आहे की, "एक मदतीचा हात एखाद्याचे आयुष्य बदलू शकतो." त्यामुळे भविष्यातही आरोग्य, शिक्षण, पर्यावरण, आपत्ती निवारण, वारकरी सेवा आणि विविध सामाजिक उपक्रमांद्वारे समाजहिताचे कार्य अधिक व्यापक स्वरूपात राबविण्याचा संस्थेचा दृढ संकल्प आहे.

चला... समाजासाठी जगण्याचा संकल्प करूया.

सेवेचा हात पुढे करूया.

माणुसकीची ज्योत कायम तेवत ठेवूया.

🙏 "वारकरी सेवा म्हणजे विठ्ठल सेवा... आणि निःस्वार्थ समाजसेवा म्हणजेच ईश्वराची खरी उपासना." 🙏

– मनोमय हिलिंग हार्ट फाउंडेशन, राहाता

विठ्ठलाच्या भक्तांसाठी... माणुसकीचा छोटासा हात, आनंदाचा मोठा आधार!मनोमय हीलिंग हार्ट फाउंडेशनच्या 'सेतू संगम' उपक्रमातून वाकडी ते पंढरपूर पायी दिंडीतील ७०० वारकरी भक्तांना मोफत रेनकोटांचे वितरण

विठ्ठलाच्या भक्तांसाठी... माणुसकीचा छोटासा हात, आनंदाचा मोठा आधार!

मनोमय हीलिंग हार्ट फाउंडेशनच्या 'सेतू संगम' उपक्रमातून वाकडी ते पंढरपूर पायी दिंडीतील ७०० वारकरी भक्तांना मोफत रेनकोटांचे वितरण

आषाढी वारी म्हणजे महाराष्ट्राच्या संस्कृतीचा, भक्तीचा आणि मानवतेचा अखंड वाहणारा प्रवाह. लाखो वारकरी "ज्ञानोबा-तुकाराम"चा गजर करत, विठ्ठलाच्या दर्शनाच्या ओढीने पंढरपूरकडे चालत असतात. त्यांच्या या प्रवासात पाऊस, ऊन, वारा, थकवा किंवा अडचणी कधीच त्यांच्या श्रद्धेचा मार्ग रोखू शकत नाहीत. कारण त्यांच्या पावलांत भक्ती असते आणि मनात विठुरायावरचा अढळ विश्वास असतो.

अशाच या भक्तिमय प्रवासात, पावसाच्या सरींमध्ये चालणाऱ्या वारकऱ्यांसाठी मनोमय हीलिंग हार्ट फाउंडेशन, राहाता यांनी 'सेतू संगम' उपक्रमांतर्गत एक हृदयस्पर्शी आणि सेवाभावी उपक्रम राबवला. वाकडी येथील श्री खंडोबा मंदिर ते पंढरपूर पायी दिंडीतील तब्बल ७०० वारकरी भक्तांना मोफत रेनकोटांचे वितरण करण्यात आले.

हा उपक्रम केवळ रेनकोट वाटण्यापुरता मर्यादित नव्हता; तर तो प्रत्येक वारकऱ्याला दिलेला एक निःशब्द संदेश होता—"तुमच्या भक्तीच्या प्रवासात समाज तुमच्या पाठीशी खंबीरपणे उभा आहे." पावसापासून संरक्षण देणारा प्रत्येक रेनकोट हा प्रेम, आपुलकी, संवेदनशीलता आणि सामाजिक जबाबदारीचा स्पर्श घेऊन वारकऱ्यांपर्यंत पोहोचला.

एखाद्या गरजेच्या क्षणी मिळालेली छोटीशी मदत माणसाच्या मनात आयुष्यभर घर करून राहते. वारकऱ्यांच्या चेहऱ्यावर उमटलेले समाधान, त्यांच्या डोळ्यांतील कृतज्ञतेचे भाव आणि ओठांवरील निरागस स्मित हीच या उपक्रमाची खरी कमाई ठरली. त्या क्षणी वाटप झाले ते फक्त रेनकोटांचे नव्हे, तर माणुसकीचे, विश्वासाचे आणि प्रेमाचे.

हा सेवाभावी उपक्रम श्री शिवाजी लहारे (तात्या), श्री अमृतराव कोते, श्री बी. डी. शेळके, श्री रोहित साबळे    श्री गंगा नाना कोते, श्री अनिल काका शेळके, श्री चांगदेव पावशे  प्रदीप जगदाळे, भाऊसाहेब साळुंके तसेच वाकडी व  पंचक्रोशीतील ग्रामस्थांच्या मार्गदर्शनाखाली यशस्वीपणे पार पडला. ग्रामस्थांच्या सहकार्यामुळे आणि सामाजिक एकतेच्या बळावर हा उपक्रम अधिक प्रभावी ठरला.

या उपक्रमासाठी डॉ. येलम यांच्या नेतृत्वाखालील टीमने विशेष परिश्रम घेतले. कु. सिद्धी गाडेकर, श्री पोपट गायकवाड, श्री रविंद्र शेळके, श्री किरण वाणी, डॉ संकेत येलम,श्री तुषार पगार (संभाजीनगर), सौ. पल्लवी नरारे, श्री. जनार्धन गाढवे, पृथ्वीराज दिवटे...तसेच फाउंडेशनच्या इतर सर्व सदस्यांनी निस्वार्थ सेवाभावाने सहभाग घेतला. प्रत्येक स्वयंसेवकाने वारकऱ्यांना रेनकोट देताना त्यांच्या चेहऱ्यावर उमटणारा आनंद अनुभवला आणि हाच आनंद त्यांच्यासाठी सर्वात मोठा पुरस्कार ठरला.

मनोमय हीलिंग हार्ट फाउंडेशन नेहमीच आरोग्य, सामाजिक जाणीव, मानसिक स्वास्थ्य आणि मानवसेवा या क्षेत्रात विविध उपक्रम राबवत असते. 'सेतू संगम' हा उपक्रमही समाजातील विविध घटकांमध्ये प्रेम, विश्वास आणि सहकार्याचा सेतू निर्माण करण्याच्या उद्देशाने राबविण्यात आला. या उपक्रमाने पुन्हा एकदा सिद्ध केले की, समाजातील सकारात्मक बदल मोठ्या घोषणांनी होत नाहीत; ते संवेदनशील मनांनी आणि निस्वार्थ कृतींनी घडतात.

वारकरी संप्रदाय आपल्याला समता, बंधुभाव, प्रेम आणि सेवाभाव शिकवतो. त्याच परंपरेचा वारसा पुढे नेत मनोमय हीलिंग हार्ट फाउंडेशनने भक्ती आणि सामाजिक जबाबदारी यांचा सुंदर संगम घडवून आणला. वारकऱ्यांच्या प्रवासात दिलेली ही छोटीशी साथ त्यांच्या मनात कायमची जपली जाणारी आठवण बनली.

पावसाच्या प्रत्येक सरीसोबत माणुसकीची ऊबही बरसत होती. कारण रेनकोट शरीराला संरक्षण देत होता; पण त्यामागचा सेवाभाव मनाला स्पर्श करून जात होता.

"विठ्ठलाच्या दर्शनासाठी चालणाऱ्या प्रत्येक पावलासोबत जर माणुसकीही चालत असेल, तर तीच खरी वारी... आणि तीच खरी सेवा."

लायन्स क्लब राहाता सह्याद्रीचे प्रेसिडेंट ला. सागर रोकडे, सेक्रेटरी ला. अमोल उगले तर ट्रेझरर पदी ला. सुनील धाडगे यांची निवड.

लायन्स क्लब राहाता सह्याद्रीचे प्रेसिडेंट ला. सागर रोकडे, सेक्रेटरी ला. अमोल उगले तर ट्रेझरर पदी ला. सुनील धाडगे यांची निवड.

   : अहिल्यानगर जिल्ह्यात सेवेची उच्च गुणवत्ता देणाऱ्या लायन्स क्लबमध्ये राहाता येथील लायन्स क्लब ऑफ राहाता सह्याद्रीचे प्रेसिडेंटपदी येथील बांधकाम व्यावसायिक इंजिनिअर ला. सागर रोकडे, सेक्रेटरीपदी ला. अमोल उगले तर ट्रेझरर पदी ला. सुनील धाडगे यांची निवड सर्वानुमते टाळ्यांच्या गजरात करण्यात आली. 

            दि. 5 जून रोजी घेण्यात आलेल्या लायन्स क्लब राहाता सह्याद्रीच्या खास मिटिंगच्या अध्यक्षस्थानी प्रेसिडेंट ला. विनोद गाडेकर हे होते. चार्टर प्रेसिडेंट ला. राजेंद्र फंड यांनी नवीन वर्षाच्या पदाधिकारी निवडीबाबत ठराव मांडला. प्रेसिडेंट ला. विनोद गाडेकर यांनी वरील तीन ही पदाधिकारी यांचे नावाबाबत  सूचित केले असता सभागृहातील सर्वांनी एकमताने त्यांच्या निवडीला मान्यता दिली.

                    नूतन प्रेसिडेंट ला. सागर रोकडे हे सिव्हिल इंजिनिअर असून त्यांची बांधकाम क्षेत्रात एस. आर. कन्स्ट्रक्शन नावाची एक यशस्वी फर्म आहे. सेवाकार्याची त्यांना खूप आवड आहे. 

                   नूतन सेक्रेटरी ला. अमोल उगले हे संचीती  इन्स्टिट्यूट ऑफ हॉटेल मॅनेजमेंट अँड व्हिजन हाऊसकीपिंग सोल्युशनचे डायरेक्टर आहे.  साईबाबांचे ते खास सेवेकरी असून त्यांच्या सेवाकार्याचा उपयोग लायन्स क्लब ऑफ राहाता सह्याद्री यांना निश्चित होईल. 

             नूतन ट्रेझरर ला. सुनील धाडगे हे क्लबचे फाऊंडर सदस्य असून एक यशस्वी व्यावसायिक आहे. गेल्या सात वर्षांपासून ते दुर्गम, आदिवासी, गरीब विद्यार्थी असलेली जिल्हा परिषदेची शाळेतील शेकडो मुलांना दप्तर वाटप करतात. त्यांचे हे दरवर्षीचे सेवाकार्य लायन्स क्लब ऑफ राहाता सह्याद्रीसाठी अभिमानास्पद आहे.

             हे तीन ही पदाधिकारी लायन्स क्लब ऑफ राहाता सह्याद्रीसाठी या वर्षीचे सेवाकार्याचे आयडॉल ठरतील. 

              नूतन पदाधिकारी यांचे रिजन चेअरमन ला. ॲड.  गोंदकर, ला. सुधीर डागा, प्रेसिडेंट ला. विनोद गाडेकर, ला. राजेंद्र फंड, ला. डॉ. वैभव मालकर, लायन्स क्लब ऑफ राहाता सह्याद्रीचे सर्व सदस्य, सह्याद्री ट्रेकिंग ग्रूपचे सर्व सदस्य यांनी अभिनंदन केले आहे.

५ हजार रोपे... लाखो श्वासांचे भविष्य!'. श्वासांची गुंतवणूक' उपक्रमातून मनोमय हिलिंग हार्ट फाउंडेशनचा हरित संकल्प; भावी पिढ्यांसाठी निरोगी, हिरव्या आणि समृद्ध भविष्यासाठी समाजाला प्रेरणादायी संदेश

५ हजार रोपे... लाखो श्वासांचे भविष्य!

'श्वासांची गुंतवणूक' उपक्रमातून मनोमय हिलिंग हार्ट फाउंडेशनचा हरित संकल्प; भावी पिढ्यांसाठी निरोगी, हिरव्या आणि समृद्ध भविष्यासाठी समाजाला प्रेरणादायी संदेश

"मुलांसाठी आपण बँकेत पैसे जमा करतो, मालमत्ता उभी करतो, सोनं-चांदी साठवतो... पण त्यांच्या आयुष्यातील सर्वात महत्त्वाच्या गोष्टीची – शुद्ध श्वासांची – गुंतवणूक करतो का?" हा प्रश्न आज प्रत्येक संवेदनशील माणसाने स्वतःला विचारण्याची वेळ आली आहे. कारण विकासाच्या वेगात आपण निसर्गापासून जितके दूर जात आहोत, तितकेच शुद्ध हवा, स्वच्छ पाणी आणि हिरवागार परिसर दुर्मिळ होत चालला आहे.

याच विचारातून मनोमय हिलिंग हार्ट फाउंडेशन, राहाता यांनी 'श्वासांची गुंतवणूक' हा आगळावेगळा आणि समाजमनाला स्पर्श करणारा उपक्रम हाती घेतला आहे. या अभियानाअंतर्गत ५ हजार रोपांची लागवड करण्यात येणार असून, हा केवळ वृक्षारोपणाचा कार्यक्रम नसून मानव, निसर्ग आणि भावी पिढ्यांप्रती असलेल्या जबाबदारीचा जाहीर संकल्प आहे.

आज लावले जाणारे प्रत्येक रोप उद्या कोणाच्या तरी जीवनाचा आधार ठरणार आहे. एखाद्या प्रवाशाला सावली देईल, एखाद्या पक्ष्याला घरटे देईल, पावसाचे थेंब धरून ठेवेल, जमिनीची धूप रोखेल आणि सर्वात महत्त्वाचे म्हणजे हजारो लोकांना शुद्ध श्वास देईल. म्हणूनच प्रत्येक रोप हे फक्त झाड नसून जीवनाचा श्वास, आशेचा किरण आणि उद्याच्या सुरक्षित भविष्याचे प्रतीक आहे.

आज जगभर हवामान बदल, वाढते प्रदूषण, तापमानवाढ आणि जंगलांची घटती संख्या ही गंभीर चिंता बनली आहे. या संकटावर केवळ चर्चा करून उपाय मिळणार नाही; कृतीची गरज आहे. 'श्वासांची गुंतवणूक' हा उपक्रम अशाच कृतीशील विचारातून साकारला आहे. कारण निसर्गाकडून घेत राहण्याऐवजी त्याला काहीतरी परत देण्याची वेळ आता आली आहे.

या हरित अभियानाला सौ. प्रियांका चव्हाण आणि श्री. प्रतीक गजेवार सर यांचे प्रेरणादायी मार्गदर्शन लाभत आहे. त्यांच्या सकारात्मक विचारसरणीमुळे आणि सामाजिक बांधिलकीमुळे हा उपक्रम अधिक व्यापक स्वरूप धारण करत आहे.

तसेच डॉ.  येलम आणि त्यांच्या समर्पित टीमने या अभियानात उत्स्फूर्त सहभाग नोंदवत सामाजिक उत्तरदायित्वाची भावना कृतीतून जपली आहे.

या उपक्रमाला पृथ्वीराज दिवटे, सिद्धी गाडेकर, किरण वाणी, जनार्दन गाढवे, पल्लवी नरारे, डॉ. संकेत येलम, संतोष दीक्षित महाराज तसेच वारकरी संप्रदायातील सर्व गोपाल यांचे मोलाचे सहकार्य आणि उत्स्फूर्त प्रतिसाद लाभला आहे. विविध क्षेत्रातील मान्यवर, सामाजिक कार्यकर्ते आणि पर्यावरणप्रेमी यांच्या सहभागामुळे हा उपक्रम लोकचळवळीचे स्वरूप धारण करत आहे.

या अभियानाचे वैशिष्ट्य म्हणजे वृक्षलागवड करून थांबणे नव्हे, तर प्रत्येक रोपाचे संगोपन करून त्याला वृक्ष बनवण्याचा निर्धार. कारण रोप लावणे ही सुरुवात असते; त्याचे संरक्षण आणि संवर्धन हीच खरी पर्यावरणसेवा असते.

झाडे कधीच स्वतःसाठी जगत नाहीत. ती आयुष्यभर निःस्वार्थपणे श्वास देतात, सावली देतात, फळे देतात, पाऊस खेचून आणतात आणि पृथ्वीवरील जीवनाचा समतोल राखतात. म्हणूनच आज लावली जाणारी ५ हजार रोपे ही केवळ संख्या नाही; ती लाखो श्वासांची हमी, असंख्य कुटुंबांच्या आरोग्याचा पाया आणि पुढील पिढ्यांना दिलेला सर्वात मौल्यवान वारसा आहे.

मनोमय हिलिंग हार्ट फाउंडेशनचा हा उपक्रम समाजाला एक महत्त्वाचा संदेश देतो—"खरी गुंतवणूक तीच, जी आपल्या नंतरही जगाला जीवन देत राहते." आपण उभारलेल्या इमारतींची उंची काळाच्या ओघात कमी होऊ शकते, पण आपण लावलेली झाडे पिढ्यान्‌पिढ्या श्वास देत राहतात आणि आपली ओळख जिवंत ठेवतात.

आज ५ हजार रोपे रुजतील; उद्या त्यातून लाखो श्वास फुलतील. म्हणून प्रत्येक नागरिकाने आपल्या आयुष्यात किमान एक झाड लावून त्याचे संगोपन करण्याचा संकल्प करावा. कारण आज आपण जे रोप लावतो, तेच उद्या आपल्या मुलांच्या भविष्याला हिरवाई, आरोग्य आणि सुरक्षित श्वास देणार आहे.

"चला... पैशांची नव्हे, श्वासांची गुंतवणूक करूया. कारण पृथ्वीवरचा प्रत्येक हिरवा श्वास हा आपल्या पुढील पिढीसाठीचा सर्वात मोठा आशीर्वाद आहे."

सावळीविहीर जंक्शनवरील वाहतूक कोंडी तीन दिवसांत संपणार; गुरुपौर्णिमेपूर्वी रस्त्याची एक बाजू खुली होणार – डॉ. सुजय विखे पाटील

सावळीविहीर जंक्शनवरील वाहतूक कोंडी तीन दिवसांत संपणार; गुरुपौर्णिमेपूर्वी रस्त्याची एक बाजू खुली होणार – डॉ. सुजय विखे पाटील

 सावळीविहीर 

नगर–मनमाड महामार्गावरील सावळीविहीर जंक्शन येथे सुरू असलेल्या रस्ते व उड्डाणपुलाच्या कामामुळे निर्माण झालेली वाहतूक कोंडी पुढील तीन दिवसांत मोठ्या प्रमाणात दूर केली जाईल. त्यासाठी राष्ट्रीय महामार्ग प्राधिकरण, सार्वजनिक बांधकाम विभाग, संबंधित ठेकेदार, पोलीस प्रशासन आणि परिसरातील ग्रामस्थ यांच्या संयुक्त बैठकीत सविस्तर कृती आराखडा निश्चित करण्यात आला असून, गुरुपौर्णिमेपूर्वी रस्त्याची एक बाजू पूर्ण करून वाहतुकीसाठी खुली केली जाईल, अशी माहिती भाजप प्रदेश उपाध्यक्ष डॉ. सुजय विखे पाटील यांनी दिली.

सावळीविहीर येथे नगर–मनमाड महामार्गाचे काम आणि राष्ट्रीय महामार्गावरील उड्डाणपुलाचे काम एकाच ठिकाणी सुरू असल्याने वाहतुकीवर दुहेरी ताण आला आहे. त्यामुळे गेल्या काही दिवसांपासून नागरिकांना मोठ्या वाहतूक कोंडीचा सामना करावा लागत आहे. या पार्श्वभूमीवर डॉ. विखे पाटील यांनी प्रत्यक्ष पाहणी करून नाशिक विभागातील राष्ट्रीय महामार्ग प्राधिकरणाचे अधिकारी, नगर विभागाचे अधिकारी, संबंधित ठेकेदार, पोलीस प्रशासन तसेच सावळीविहीर, सावळीविहीर बुद्रुक, निमगाव, निगोंज आदी पंचक्रोशीतील ग्रामस्थांची संयुक्त बैठक घेतली. तसेच पदाधिकारी ग्रामस्थ मोठ्या संख्येने उपस्थित होते.

बैठकीत वाहतूक सुरळीत करण्यासाठी विविध पर्यायी उपायांवर चर्चा करण्यात आली. अवजड वाहनांसाठी स्वतंत्र नियोजन, कामाचा वेग वाढविणे, वाहतुकीचे योग्य नियमन आणि आवश्यक त्या ठिकाणी तातडीच्या उपाययोजना करण्याचे निर्देश देण्यात आले. या सर्व उपाययोजनांची अंमलबजावणी पुढील तीन दिवसांत करण्यात येणार असून, त्यानंतर वाहतूक कोंडीची समस्या मोठ्या प्रमाणात कमी होईल, असा विश्वास डॉ. विखे पाटील यांनी व्यक्त केला.

धुळीच्या समस्येबाबत बोलताना त्यांनी स्पष्ट केले की, रस्त्याच्या भरावावर वारंवार पाणी टाकल्यास तो कोरडा होत नाही आणि त्यावर डांबरीकरण करणे शक्य होत नाही. अशा परिस्थितीत भविष्यात रस्ता खचण्याचा धोका निर्माण होतो. राहुरी परिसरातील काही रस्त्यांवर घाईत काम केल्यामुळे अशा समस्या निर्माण झाल्याचा दाखला देत त्यांनी सांगितले की, दर्जेदार आणि टिकाऊ रस्ता व्हावा यासाठी काही दिवस धुळीचा त्रास सहन करावा लागेल. अनेक वर्षांपासून प्रलंबित असलेले हे काम कायमस्वरूपी दर्जेदार व्हावे, हीच प्रशासनाची भूमिका असल्याचे त्यांनी सांगितले.

गुरुपौर्णिमेपूर्वी उड्डाणपुलाच्या शेवटापासून बायपासच्या सुरुवातीपर्यंत रस्त्याची एक बाजू पूर्ण करण्यात येणार असून ती वाहतुकीसाठी खुली केली जाईल. दुसरी बाजू वाहतुकीसाठी मोटरेबल ठेवण्यात येईल. गुरुपौर्णिमेनंतर दुसऱ्या बाजूच्या कामाला गती देण्यात येईल, असा संपूर्ण आराखडा तयार करण्यात आल्याचेही त्यांनी सांगितले.

रस्त्याच्या मध्यरेषेपासून १५ मीटरच्या हद्दीत येणारी सर्व अतिक्रमणे दोन दिवसांत स्वेच्छेने हटवावीत, असे आवाहन करत त्यांनी स्पष्ट इशारा दिला की, मुदतीनंतर पोलीस प्रशासनाच्या मदतीने कारवाई करून सर्व अतिक्रमणे हटविण्यात येतील. या अतिक्रमणांमध्ये काही मंदिरे, टपऱ्या आणि इतर बांधकामांचाही समावेश असल्याचे त्यांनी सांगितले.

ठेकेदारावर होत असलेल्या टीकेबाबत बोलताना डॉ. विखे पाटील म्हणाले की, संबंधित ठेकेदाराची नियुक्ती केंद्र शासनाने केली आहे. तो कोणाचाही नातेवाईक किंवा ओळखीचा व्यक्ती नसून, त्याच्याकडून दर्जेदार काम करून घेणे हेच आमचे उद्दिष्ट आहे. कामात त्रुटी आढळल्यास त्या निश्चितपणे दुरुस्त केल्या जातील; मात्र अधिकारी आणि ठेकेदारांशी अरेरावी करून प्रश्न सुटणार नाहीत. उलट ठेकेदाराने काम सोडले तर प्रकल्प आणखी विलंबित होईल, याचाही विचार नागरिकांनी करणे आवश्यक असल्याचे त्यांनी नमूद केले.

“दहा वर्षांपासून या रस्त्यामुळे नागरिक त्रस्त आहेत. आता प्रत्यक्षात काम सुरू झाले आहे. त्यामुळे संयम ठेवून दर्जेदार काम पूर्ण होऊ देणे गरजेचे आहे. चुका झाल्यास त्या दुरुस्त केल्या जातील, पण विकासकामांना अडथळा निर्माण होणार नाही याचीही सर्वांनी काळजी घ्यावी,” असे आवाहन त्यांनी केले.

यावेळी त्यांनी आणखी एक महत्त्वाची बाब अधोरेखित करत सांगितले की, या कामासाठी सुमारे ४० टक्के कमी दराने ठेका स्वीकारणारा ठेकेदार मिळाला आहे. स्थानिक पातळीवर कोणत्याही प्रकारच्या टक्केवारीची मागणी नसल्याने कामाला गती मिळाली आहे. ज्या ठिकाणी अशा प्रकारच्या अडचणी निर्माण होतात, तेथे विकासकामे वर्षानुवर्षे रखडतात, अशी टिप्पणीही त्यांनी केली.

दरम्यान, जिल्ह्यात सुरू असलेल्या दूध भेसळविरोधी कारवाईबाबतही डॉ. सुजय विखे पाटील यांनी भूमिका मांडली. भेसळ करणाऱ्यांवर कठोर कारवाई व्हायलाच हवी, या भूमिकेला त्यांनी स्पष्ट पाठिंबा दिला. मात्र, कोणतीही कारवाई करण्यापूर्वी प्रशासनाने सखोल पडताळणी करणे आवश्यक असून, चुकीच्या पंचनाम्यांमुळे किंवा एकतर्फी कारवाईमुळे प्रामाणिक दूध उत्पादक शेतकऱ्यांवर अन्याय होणार नाही, याची काळजी घेणे गरजेचे असल्याचे त्यांनी सांगितले. मागील काही दिवसांपासून सुरू असलेल्या कारवायांना मिळत असलेल्या प्रसिद्धीवरही त्यांनी प्रश्न उपस्थित केला. “यापूर्वीही संबंधित अधिकारी अशा कारवाया करत होते. मात्र, आता अचानक या कारवायांना एवढी प्रसिद्धी का मिळत आहे?” असा सवाल त्यांनी उपस्थित करत, प्रशासनाने निष्पक्ष, पारदर्शक आणि वस्तुनिष्ठ पद्धतीने कारवाई करावी, अशी अपेक्षा व्यक्त केली