दिव्यांगाच्या मदतीसाठी राहाता सह्याद्री क्लबचे मोठे योगदान

दिव्यांगाच्या मदतीसाठी राहाता सह्याद्री क्लबचे मोठे योगदान 

 

        

लायन्स क्लब ही समाजसेवा करणारी जागतिक पातळीवरील सामाजिक संस्था असून दररोज जगभर विविध ठिकाणी  सामाजिक उपक्रम चालू असतात. लायन्स क्लब राहाता सह्याद्रीचे या परिसरात सामाजिक योगदान खूप मोठे आहे आणि आम्ही याचे साक्षीदार आहोत.  आज या क्लबचे प्रेसिडेंट ला. राजेंद्र फंड व स्मार्ट कॉम्प्युटरचे  संचालक ला.  सत्यम सदाफळ यांचे वतीने  लायन्स क्लब राहाता सह्याद्रीने  " एकता " या  बौद्धिक अक्षम असलेल्या दिव्यांग शाळेसाठी  त्यांची गरज ओळखून कॉम्प्युटर संच भेट देवून  एक सत्कार्य केले आहे. कै. वसंतराव जाधव या निवृत्त शिक्षकाने  आपल्या सेवानिवृत्तीचा सर्व पैसा या शाळेसाठी लावला. व  बौद्धिक अक्षम मुलांसाठी या जाधव कुटुंबाने  एक शैक्षणिक मंदिर उभे केले व दिव्यांगांच्या पालकांना काही काळ सुखाचा श्वास  मोकळा करून दिला. असे उदगार  दैनिक पुण्यनगरीचे पत्रकार श्री. दिलीप खरात यांनी उद्घाटनप्रसंगी काढले. 

                        यावेळी प्रमुख पाहुणे म्हणून ला. डॉ.  दत्ता कानडे व ला. डॉ. स्वाधीन गाडेकर हे या वेळी उपस्थित होते.  या सर्व मान्यवरांच्या हस्ते फित कापून उद्घाटन केले. प्रास्ताविकात प्रेसिडेंट ला. राजेंद्र फंड म्हणाले की बौद्धिक अक्षम मुलांसाठी कै. वसंतराव जाधव, संचालक श्री. बाळासाहेब जाधव,   अमिता जाधव, व कामिनी जाधव  यांचे कार्य खरोखरच महान आहे. सौ. अमिता जाधव यांचा गेल्या 13 वर्षाचा दिव्यांग मुलांना शिकविण्याचा अनुभव  या बौद्धिक अक्षम मुलांसाठी खूप महत्वाचा आहे. या मुलांना शिक्षणासोबत व्यावसायिक शिक्षण देवून त्यांना आर्थिक सक्षम बनविण्याचे महत्वाचे कार्य ही एकता  शाळा करते. 

             प्रसिद्ध स्त्रीरोग तज्ञ ला.डॉ.  दत्ता कानडे म्हणाले की लायन्स क्लब राहाता सह्याद्री  नेहमी योग्य ठिकाणीच मदत करते. आज कॉम्प्युटर संच देवून दिव्यांगांना आधुनिक शिक्षणाची जोड देण्याचे दालन खुले करण्यात आले आहे. या संचामुळे या विद्यालयातील हे 25 बौद्धिक अक्षम मुले संगणकाचे ज्ञान मिळवू शकतील.  व्हॉईस प्रेसिडेंट डॉ. ला. स्वाधीन गाडेकर म्हणाले की अल्पावधीतच  आमच्या लायन्स क्लब राहाताचे सेवाकार्य हे 3234 डी 2  या डिस्ट्रिक्टमध्ये  चांगला क्लब म्हणून  गणला जातो. हा क्लब नेहमी वर्षानुवर्षे चालत आलेले तेच तेच सेवाकार्याला फाटा देवून नवीन उपक्रम राबवितात. 

          क्लबचे संस्थापक ला. विनोद गाडेकर म्हणाले की आजच या दिव्यांग शाळेत कॉम्प्युटर संच देण्याबरोबरच  प्रवरा कम्यूनिटी रेडिओच्या माध्यमातून  क्लबच्या प्रसिध्दी प्रमुख तथा रेडिओच्या इन्चार्ज ला. गायत्री म्हस्के यांनी दिव्यांगासाठी एक तासाचा लाईव्ह शो करून दिव्यांगांच्या व्यथा व जनतेचे कसे सहकार्य हवे तसेच या एकता दिव्यांग शाळेची माहिती, लायन्स क्लब राहाता सह्याद्रीचे  कार्य याविषयी सर्वांना माहिती दिली. एकाच कार्यक्रमात दोन वैशिष्ट्यपूर्ण कार्यक्रम या क्लबने घडवून आणले. 

                ला. सत्यम सदाफळ म्हणाले की क्लबने मला ही सेवा करण्याची संधी देवून मला आणखी सेवाकार्य करण्याची उमेद  दिली. या विद्यालयाचे संचालक म्हणाले की माझा मुलगा दिव्यांग असल्याने मला यांच्या दुःखाची  कल्पना होती म्हणून  माझ्या वडिलांनी असा निर्णय घेतला की माझ्या नातवाबरोबर इतर ही मुलांसाठी दिव्यांग शाळा काढू. म्हणून सेवानिवृत्तीनंतर आलेला सर्व पैसा या शाळेत घातला. लायन्स क्लब राहाता सह्याद्री यांनी दुसऱ्यांदा आम्हाला मदत देवून उपकृत केले. त्याबद्दल आम्ही सर्वांचे आभारी आहोत.

                     व्हॉईस प्रेसिडेंट ला. सुनील धाडगे यांनी आभार प्रदर्शन केले. या कार्यक्रमासाठी सेक्रेटरी  ला. सागर रोकडे, ला. मिनिनाथ तेलोरे, ला. रावसाहेब  निकाळे, ला. बापूसाहेब गायकवाड, ला. सुनील काळोखे, शिवम सापिके यांनी कार्यक्रमाचे नियोजन केले.